Abanyamaguru bagira uruhare mu guteza zimwe mu mpanuka

Mu masaha y’igicamunsi, ku isaha ya saa saba kuri uyu wa mbere ubwo moto RD 780F yari itwawe na Bimenyayondi Fredreck yagongaga umusore wo mu kigero cy’imyaka hagati ya 22 na 26, i Remera, abaturage bari aho babwiye Umuseke ko hari impanuka ziba ku makosa y’abanyamaguru bikitirirwa abamotari.

Iyi mpanuka yabaye ubwo uyu musore wavaga mu cyerekezo cy’i Remera, ageze imbere ya Hotel Alpha Palace yambutse mu muhanda ahita agongwa na moto.

Abaturage bari bahari ubwo uwagonzwe yahabwa ubufasha bw’ibanze n’abaganga, ntibashidikanyaga kuvuga ko iyi mpanuka yatewe n’uburangare bw’uyu musore.

Minani Emmanuel yagize ati: “Impanuka yabaye ndeba, nari ndi aha, yatewe n’umunyamaguru kuko yiroshye mu muhanda nta kureba inyuma.”

Yavuze ko ngo uyu musore yarebye imbere abona aho ajya nta modoka ihari, ahita yinjira mu muhana kandi ngo umumotari we yaje abona ko abo bantu bakomeje kugenda.

Abagenzi bavuga ko aya makosa atari ubwambere bayabonye. Undi twaganiriye we yatubwiye ko na we yabikoze arimo yiruka ku muntu wari wamusize, ku bw’amahirwe ntibamugonga.

Ati: “Abamoteri baba barengana, natwe turi abanyamafuti, ndakubwira ngo nanjye ejobundi bari bangongeye hariya. Nanjye nirebeye muri kiriya kerekezo sinareba inyuma, nkurikiye umuntu wamaze kugera hano ngo atansiga.”

Bavuga ko byaba byiza umuntu agiye abanza kureba imbere n’inyuma mu gihe agiye kwambuka umuhanda.

Abamotari na bo bahamya ko abanyamaguru bajya bitwara nabi mu gukoresha umuhanda nubwo baba bafite uburenganzira, ariko ngo babukoresha nabi.

Manishimwe Innocent utwara abagenzi kuri moto, ati: “Kubera ko Leta irenganura abanyamaguru, akumva ko uko byagenda kose agomba kubona uburenganzira aho ariho hose, nta kindi kintu yitayeho, hari ubwo tugira ikibazo umuntu akaza yambaye ‘ecouteur’, avugira kuri telefoni, cyangwa yarangaye ku bundi buryo agahita yijugunya mu muhanda.”

Iyi mpanuka yabaye, bigaragara ko umugenzi nta bikomere by’inyuma yagize, yahise yihutishwa mu bitaro bya Kibagabaga n’imbangukiragutabara.

Callixte NDUWAYO
UM– USEKE.RW