Abahanzi bahatanira PGGSS VI bahaye Mutuelle de Santé abantu 1000

Kuri uyu wa kane, abahanzi bahatanira Primus Guma Guma Super Star ya gatandatu (PGGSSVI) bafashije abaturage batishoboye bo mu Kagari ka Ngoma, Umurenge wa Kicukiro, Akarere ka Kicukiro bishyurira abagera ku 1 000 ubwisungane mu kwivuza (Mutuelle de Santé).

Aba bahanzi batanze Miliyoni eshatu (3 000 000) z’amafaranga y’u Rwanda, zizishyurira ubwisungane mu kwivuza abaturage batishoboye barimo n’abarokotse Jenoside yakorewe Abatutsi bagera ku 1 000.

Ubu bwisungane mu kwivuza ni ubuzatangirana n’umwaka utaha w’ingengo y’imari uzatangira muri Nyakanga uyu mwaka.

Murebwayire Alphonsine, Umuyobozi w’Umurenge Kicukiro yashimiye abahanzi ku kuba bazirikanye abatishoboye bakabatera inkunga, hanyuma abasaba kubikomeza.

Humble wo mu itsinda rya Urban Boys, wavuze mu izina ry’abahanzi bose yavuze ko bifuje gukora igikorwa nk’urubyiruko rw’ejo hazaza, kugira ngo babere urugero abakiri.

Rutaganda Joel
UM– USEKE.RW