Abadepite batunze agatoki RUSWA nka kimwe mu bidindiza iyubakwa ry’imihanda

Ubwo abadepite bagize Komisiyo yo gukurikirana imikoreshereze y’imari ya Leta (PAC) bakiraga ikigo gishinzwe kubaka imihanda no guteza imbere ubwikorezi (RTDA) na Minisiteri y’ibikorwa remezo (MININFRA), bavuze ko RUSWA ishobora kuba iri mu bituma imirimo yo kubaka imihanda ikarangirira igihe idindira.

Abadepite babazaga ibibazo bagendeye ku makosa yo kudacunga neza ibya Leta yagaragajwe na raporo y’Umugenzuzi w’Imari ya Leta ya 2012-13. Ayo makosa akaba arimo kutagira inyandiko ziherekeza amafaranga yasohotse, njyanama y’Ubutegetsi idakora 100% uko ibisabwa, ndetse hagaragaye imihanda itarangirara igihe, kimwe no kutishyura ingurane zose ku baturage bimuwe ahazubakwa ikibuga cy’indege cya Bugesera.

Abadepite basanze inama y’Ubutegetsi ya RTDA idakoreshwa uko bikwiye bigatuma imirimo imwe n’imwe idindira.

Ikigo RTDA cyanenzwe ko imihanda itubakwa ngo irangirire igihe, ndetse imwe ikaba yubakwa rimwe na rimwe (mu gihe hagiye kuba Umwiherero w’abayobozi), umuhanda watinzweho, Zaza-Rwamagana, wo muri raporo bavuze ko wari kuba warangiye muri Mata, 2015 na n’uyu munsi nturarangira.

Umunyamabanga Uhoraho muri MININFRA, Rwakunda Christian wari kumwe n’umuyobozi wa RTDA, Guy Muhigirwa Kalisa ndetse na Perezida w’Inama y’Ubutegetsi muri RTDA, Leopold Mbereyaho, babwiye abadepite ko mu idindira ry’imirimo yo kubaka imihanda, biterwa n’amakampani yubaka.

Abadepite ariko ntibanyuzwe n’ibi bisobanuro, kuko ngo ikibazo ni ukudakurikirana aho imirimo igeze, kuko ngo inzobere mu bwubatsi ntiyananirwa kureba igihe imirimo runaka isigaje, kugera ubwo avuga ngo hasigaye iminsi 20 ngo umuhanda utahwe, ariko hakarenga amezi atatu umuhanda utaruzura.

Ibyo abadepite babihuje n’icyacumi (10%) gikunze kuvugwa mu masoko ya Leta, aho abayobozi ba RTDA bavuze ko uwatsindiye isoko yishyurwa avance ingana na 30% mu gihe itegeko riteganya hagati ya 10-20%, ibyo ngo niho hava gusangira ayo mafaranga bigatera ikimenyane.

Hon Nkusi ukuriye PAC yagize ati “Rwiyemezamirimo aba yaraje gushaka amafaranga, mumukurikiranye neza imirimo yasabwe yayikora neza, ariko numwaka icyacumi (10%) iyo mirimo ntazayikora kuko na we uzaba ubifitemo inyungu.”

Ikindi kibazo cyasuzumwe n’abadepite ni icy’ibikoresho birimo za mudasobwa byibwe muri RTDA ndetse n’amafaranga byagaragaye ko yasohotse adafite inyandiko ziyaherekeza, harimo n’umushinga wa RUKARARA, ariko nk’uko byagaragaye uwari umukozi ushinzwe ibikoresho yasezeye ku kazi adahanwe, ndetse n’uwari ukuriye iby’Imari na we yasezeye ku mirimo ye atabajijwe ayo makosa.

Mu kiganiro cyihariye, Umunyamabanga Uhoraho muri Ministeri y’Ibikorwa remezo, Rwakunda yabwiye abanyamakuru ko, umuturage umwe ari we utaremeye agaciro yabaruriwe ku mitungo ye iri ahazubakwa ikibuga cy’indege cya Bugesera, avuga ko bitarenze uku kwezi biba byakemutse.

Yavuze ko guhura n’abadepite byaberetse inenge, ibityo ngo bakaba bagiye kurushaho gukoresha inama y’Ubutegetsi kugira ngo ibafashe mu kazi ka buri munsi, kandi ngo bizakemura ibibazo byari bihari.

Iyi ni inshuro ya kane raporo y’Umugenzuzi w’Imari ya Leta isohoka ivuga kuri iki kigo cya RTDA, muri rusange ngo iki kigo cyarivuguruye ugereranyije n’amakosa yagaragajwe.

Amafatoto/HATANGIMANA/UM– USEKE

HATANGIMANA Ange Eric
UM– USEKE.RW