APR FC itsinze Etincelles 2-1… Djamar wari umaze iminsi 630 mu mvune yakinnye

Mu mukino w’umunsi wa karindwi wa shampiyona y’u Rwanda (AZAM Rwanda Premier League), APR FC itsinze Etincelles FC 2-1. Kambale Salita Gentil atsinze igitego cya gatandatu mu mikino indwi (7). Jimmy Mulisa watoje umukino wa mbere yagaruye Djamar Mwiseneza mu kibuga nyuma y’amezi 21 yari amaze adakina kubera imvune.

Muri uyu mukino wabereye kuri Stade ya Kigali i Nyamirambo, APR FC yakiriye Etincelles FC iyitsinda 2-1, bya Issa Bigirimana na Bizimana Djihad. Kambale Salita Gentil atsinda impozamarira.

Jimmy Mulisa watozaga umukino wa mbere, yari afite ibibazo byinshi by’imvune z’abakinnyi basanzwe babanzamo nka Muhadjiri Hakizimana, Butera Andrew, Sekamana Maxime, Blaise Itangishaka na Onesme Twizerimana. Byatumye akoresha abasore benshi badasanzwe babona umwanya.

Umukino watangiye Etincelles itozwa na Ruremesha Emmanuel ikinira inyuma, byafashaga APR FC gusatira no kugera imbere y’izamu ryari ririnzwe na Rukundo Protegene bita Tiger. Kotswa igitutu byatumye agongana na myugariro we aravunika, ku munota wa 21 asimbuzwa Nsengimana Dominique.

APR FC yakomeje gusatira ishaka gufungura amazamu, byayihiriye ku munota wa 34, mu mvururu zabaye imbere y’izamu rya Etincelles FC, Nkinzingabo na Yannick Mukunzi bagerageza gutera mu izamu ariko umunyezamu wagiyemo asimbuye akawukubita ibipfunsi, umupira usanga Issa Bigirimana wari uhagaze wenyine, atsindira APR FC igitego cya mbere. Igice cya mbere kirangira ari 1-0.

Mu gice cya kabiri, ikipe y’ingabo z’igihugu yakomeje gusatira inagaragaza inyota yo gutsinda ibitego byinshi. Jimmy Mulisa na Yves Rwasamanzi bayitoza basimbuje, Patrick Simbomana afata umwanya wa Fiston Nkinzingabo, na Innocent Habyarimana bita Dimaria asimburwa na Mwiseneza Djamar.

Uyu musore yari wari ugiye kumara imyaka ibiri adakina dore ko amaze amezi 21 adakandagira mu mikino y’amarushanwa, kuko yavunitse tariki 2 Gashyantare 2015, mu mukino APR FC yanyagiyemo Rayon sports 4-0.

Izi mpinduka zafashije ikipe ya Jimmy Mulisa, kuko APR FC yatumaga abo hagati ba Etincelles nka Shadad Nsengayire na Mugenzi Cedrick batabona umwanya wo kwigaragaza.

Kuyobora umukino byavuyemo igitego cya kabiri ku munota wa 53, ku ishoti rikomeye Bizimana Djihad yatereye hanze y’urubuga rw’amahina, uyu musore uvuka i Rubavu, yishimira igitego cya mbere atsinze Etincelles yamureze.

Mu minota ya nyuma y’umukino, Ruremesha yongeyemo rutahizamu Mumbele Saiba Claude, wagoye cyane ba myugariro ba APR FC, agerageza amashoti abiri yashoboraga kubyara igitego, ariko Steven Ntaribi yitwara neza.

Uyu  musore wongereye imbaraga mu busatirizi, ku munota wa 87 yahaye umupira Kambale Salita Gentil, atsinda igitego cy’impozamarira kuri Etincelles FC, igitego cya gatandatu (6) mu mikino indwi ya shampiyona kuri uyu rutahizamu ukomoka muri DR Congo. Umukino warangiye APR FC itsinze 2-1.

APR FC yabanjemo abakinnyi 11 nka Steven Ntaribi, Rusheshangoga Michel, Emmanuel Imanishimwe, Herve Rugwiro, Faustin Usengimana (c), Yannick Mukunzi, Benedata Janvier, Djihad Bizimana, Nkinzingabo Fiston, Innocent Habyarimana na Issa Bigirimana.

Ku ruhande rwa Etincelles FC ibanzamo Rukundo Protogene, Nahimana Djuka, Mbonigaba Rigis, Kayigamba Jean Paul, Baramosa Mabomba, Nsengiyumva Ildesbard, Manishimwe Yves, Byamungu Abass, Nsengayire Shadad, Mugenzi Cedrick, na Kambale Salita Gentil.

Photo @Ishimwe Innocent/Umuseke

Roben NGABO
UM– USEKE