Igisirikare cya Niger kivuganye abarwanyi 38 ba Boko Haram

Minisiteri y’Ingabo muri Niger iratangaza ko mu gikorwa cyo guhashya umutwe w’Iterabwiba wiyita ko ugendera ku mahame akarishye ya Kisilamu ‘Boko Haram’ , igisirikare cy’iki gihugu kishe abarwanyi 38 b’uyu mutwe wo muri Nigeria.

Ni mu bitero byo kurwanya uyu mutwe umaze iminsi uhungabanya umutekano w’igihugu cya Nigeria n’ibihugu bihana imbibi, cyabereye mu gace kitwa Diffa gaherereye mu Magepfo y’Uburasirazuba bw’igihugu cya Niger.

Ku mugoroba wo kuri uyu wa Gatanu, kuri Television y’Igihugu ya Nigeria, Col Moustapha Michel Ledru yavuze ko muri iyi mirwano yahitanye abarwanyi 38 ba Boko Haram, yanakomerekeyemo abasirikare ba Niger babiri gusa.

Kuwa Kabiri w’iki cyumweru, Col Ledru yari yatangaje ko abasirikare batanu ba Niger n’abarwanyi 30 ba Boko Haram bari biciwe mu mu mirwano yari yagabwe n’uyu mutwe w’iterabwoba.

Mu myaka irindwi uyu mutwe wa Boko Haram umaze ukore ibikorwa by’iterabwoba, umaze kwivugana abantu bagera mu bihumbi 20, ukaba waranatumye abandi benshi bava mu byabo.

Uyu mutwe kandi wagiye ugaba ibitero ku mipaka y’ibihugu bihana imbibi na Nigeria birimo Niger yivuganye aba barwanyi, Chad na Cameroo, byose bikomeje gutanga ubufasha mu guhashya uyu mutwe w’iterabwoba.

UM– USEKE.RW