Turkey: Leta yiyemeje kuvana IS ku mupaka wayo

Nyuma y’aho abarwanyi b’umutwe wiyita Leta ya Kisilamu bigambye igitero cyahitanye abantu 54 muri Turkey, kuri uyu wa mbere, leta ya y’iki gihugu yatangaje ko igiye gukora ibishoboka byose igakura abarwanyi b’uyu mutwe bashinze ibirindiro hafi y’umupaka uhuza iki gihugu na Syria.

Iki gitero cyagabwe kuwa Gatandatu mu mugi wa Gaziantep mu bukwe bw’abazwi nk’aba ‘Kurdish’, kigabwe n’umwana uri hagati y’imyaka 12 na 14, cyahitanye abantu 54 barimo abana 22.

Nyuma y’aho umutwe wiyita Leta ya Kisilamu wigambye iki gitero, inzego zishinzwe umutekano muri iki gihugu zahise zitangira iperereza.

Umwe mu bayobozi bakuru mu by’umutekano muri Turkey yatangarije Ibiro ntaramakuru by’Abongereza, Reuters ko ibikoresho byari bikoze igisasu cyaturikijwe muri ubu bukwe ari bimwe n’ibyari bikoze ikindi gisasu cyakoreshejwe mu gitero cyo muri 2015 mu mujyi Ankara.

Avuga ko icyo gitera cyari cyakozwe na Islamic State, ngo ni cyo cyahitanye abantu benshi mu mateka ya Turkey kuva yatangira kugabwaho ibitero bimeze bitya dore ko cyari cyahitanye abantu 100.

Mu kiganiro n’Abanyamakuru kuri uyu wa mbere, Minisitiri w’ububanyi n’amahanga wa Turkey, Mevlut Cavusoglu , yavuze ko Leta igiye gukora ibishoboka byose kugira ngo birukane abarwanyi b’uyu mutwe bashinze ibirindiro hafi y’umupaka uhuza Turkey na Syria.

Ati “ Daesh (Islamic state) bagomba gukurwa ku mupaka wacu, twiteguye gukora buri kimwe cyadusaba kugira ngo bishoboke.”

Iki gitero kigabwe nyuma y’ukwezi kumwe muri Turkey habaye imvururu zo kugerageza guhirika ubutegetsi.

Imiryango y’abari bakoze ubukwe bwagabwemo iki gitero cyo kuwa Gatandatu batangaje ko umugeni ari mu bakomeretse ariko ko umusore ntacyo yabaye.

Reuters

Callixte NDUWAYO
UM– USEKE.RW