USA yafatiye ibihano Perezida wa Koreya ya Ruguru Kim Jong Un

Leta Zunze Ubumwe za Amerika zafatiye ibihano perezida wa Koreya ya Ruguru, Kim Jong Un n’abandi bayobozi 10 b’iki gihugu zibashinja guhonyora uburenganira bwa muntu.

Abandi bayobozi ba Koreya ya Ruguru bafatiwe ibihano na Leta Zunze Ubumwe za Amerika barimo batanu bakora muri za Minisiteri.

Ibi bihano byafatiwe aba bayobozi ba Koreya ya Ruguru, birimo kutagira uburenganzira ku mitungo baba bafite muri Leta zunze ubumwe za Amerika no kubuza abaturage ba Leta zunze ubumwe za Amarika gukorana business na bo.

Mu itangazo rikubiyemo ibi bihano, rigaruka kuri Perezida wa Koreya ya Ruguru rigaragaza ko akomeje kurangwa n’ibikorwa byo guhohotera abanyagihugu.

Iri tangazo rigira riti “ Kuri ubu butegetsi bwa Kim Jong-un , Koreya ya Ruguru izakomeza kurangwamo umwuka mubi utuma abanyagihugu batishimira igihugu kubera ibikorwa by’iyicarubozo bakorerwa, imirimo y’agahato, n’ubucamanza bwo kumena amaraso.”

Muri iri tangazo ritaragira icyo rivugwaho na Koreya Ruguru, rigaragaza ko abagororwa babarirwa hagati y’ibihumbi 80 na 120 bafungiwe aho bakorerwa iyicarubozo abandi bagakorerwa ihohoterwa rishingiye ku gitsina.

Muri iri tangazo, umuvugizi wa Leta Zunze Ubumwe za Amerika, John Kirby avuga ko ibi bihano bizakoma mu nkokora Perezida Kim gukomeza gukora ibikorwa bibi bibangamiye abanyagihugu.

Ati “ Ibi bikorwa bibi bikwiye guhagarara, ntibivuze ko turekeye ngo bikomeze bikorwe kuko kuri twe tutabyishimiye, tuzakomeza kubikurikirana.”

Leta Zunze Ubumwe za Amerika zikunze kumvikana zafatiye ibihano bimwe mu bihugu cyangwa abayobozi, zafatiye ibihano abakuru b’ibihugu barimo Bashar al-Assad wa Syria, n’uwahoze ayobora Libya, Muammar Gaddafi waje no kuvanwa ku butegetsi yishwe.

UM– USEKE.RW