Global Peace Index: Ibihugu 10 gusa ku Isi nibyo bitari mu intambara

Icyegeranyo cyitwa ‘Global Peace Index’ cy’uyu mwaka kiragaragaza ko Isi ikomeje kujya mu bibazo by’intambara n’amakimbirane, kikagaragaza ko ibihugu 10 ku Isi aribyo gusa bitabarizwamo intambara n’amakimbirane ayo ariyo yose afitanye isano nayo.

Iki cyegeranyo kivuga ko kubera amakimbirane n’intambara bikomeje kuvuka mu Burasirazuba bwo hagati, no kuba Isi yaraburiye igisubizo ibibazo by’impunzi, iterabwoba, ubwicanyi, imitwe n’amatsinda yitwaje intwaro, ngo biratuma Isi irushaho gutera inkeke (dangerous), ku buryo n’umutekano rusange w’abaturage ugenda ugabanuka.

Ugereranyije n’umwaka ushize wa 2015, muri uyu mwaka wa 2016, igipimo rusange cy’amahoro cyamanutseho 0.53 ku Isi.

Ibihugu 10 gusa ku Isi, nibyo bifatwa nk’ibitari mu ntambara ndetse bikaba nta n’amakimbirane ayo ariyo yose yaba imbere mu bihugu byabo cyangwa hanze yabyo; Ibi bihugu ni Botswana, Chile, Costa Rica, Japan, Mauritius, Panama, Qatar, Switzerland, Uruguay na Vietnam.

Iyi raporo igaragaza ko mu mwaka ushize hari ibihugu 81 byazamutse mu manota agaragaza urwego rw’amahoro bifite, mu gihe ibindi 79 byamanutse. Gitekanye

Iyi raporo kandi igaragaza ko mu mwaka ushize, ibibazo bya Politike byarushijeho kuba bibi mu bihugu 39 byo hirya no hino ku Isi.

Nubwo nacyo amanota yagiye aganuka, Igihugu cya Iceland kuva mu mwaka wa 2011 nicyo cyongeye kuyobora urutonde rw’ibihugu bifite amahoro ku Isi, kiri ku mwanya wa mbere n’amanota 1.192, kigakurikirwa na Denmark, Austria, New Zealand, Portugal, Czech Republic, Switzerland, Canada, Japan na Slovenia ku myanya 10 ya mbere.

Mu gihe, Syria iza ku mwanya wa 163 ari nawo wa nyuma n’amanota 3.806, South Sudan ku mwanya wa 162, Iraq 161, Afghanistan 160, Somalia 159, Yemen 158, Central African Republic 157, Ukraine 156, Sudan 155, na Libya ku mwanya wa 154, ari nabyo bihugu bya nyuma bidafite amahoro.

Mu karere, iki cyegeranyo kigaragaza ko Tanzania ariyo ifite amahoro kurusha ibindi bihugu ku mwanya wa 58 ku Isi, Uganda 101, u Rwanda 128, Kenya 131, u Burundi 138, naho DR Congo yo iri ku mwanya wa 152.

Nubwo umugabane w’Uburayi ufite ibihugu birindwi mu 10 bya mbere bifite amahoro ku Isi, binawugira umugabane wa mbere ufite amahoro nubwo utorohewe n’iterabwoba; Ni nawo mugabane uteza ibibazo cyane ahandi ku Isi, aho raporo ishinja ibihugu by’Ubufaransa, Ubwongereza, Ububiligi n’ibindi, kuba bimwe mu bihugu biteza intambara muri Afurika no mu Burasirazuba bwo hagati. Leta Zunze ubumwe za Amerika zo ziri ku mwanya wa 103, Ubulusiya ku mwanya wa 151.

Mu gukora icyegeranyo, hagenderwa ku makuru anyuranye apima umutekano n’amahoro, uko ibihugu bibana n’ibihugu bihana imbibe, uko imbere mu gihugu abaturage bizerana, uko babana n’ibindi byinshi.

UM– USEKE.RW