U Rwanda rwazamutseho imyanya 10 ku rutonde ngarukakwezi rwa FIFA

Ikipe y’igihugu y’u Rwanda Amavubi yazamutseho imyanya 10 ku rutonde ngarukakwezi rushyirwa ahagaragara n’ishyirahamwe ry’umupira w’amaguru ku Isi, FIFA.

Nk’uko tubikesha urubuga rwa FIFA, urutonde rwa Mutarama 2016 rwo kuri uyu wa kane tariki ya 7 Mutarama 2016, u Rwanda rwazamutseho imyanya 10 ruva ku mwanya wa 101 rugera ku mwanya wa 91 ku Isi n’amanota 375.

Ibi bije mu gihe u Rwanda rubura iminsi icyenda gusa ngo rwakire igikombe cya Afurika cy’abakina imbere mu bihugu byabo, CHAN 2016.

Ibihugu biri mu itsinda A ry’u Rwanda muri CHAN 2016 byose biri imbere yarwo ku rutonde rwa FIFA.

Cote d’Ivoire ihagaze ku mwanya wa 19 ku Isi, ikaba ari na yo ya mbere ku rutonde rwa Afurika. Maroc na Gabon zirakurikiranye ku rutonde, kuko Maroc ni iya 76, mu gihe Gabon ari iya 77.

Ububiligi buracyayoboye urutonde ku rwego rw’Isi, bukurikiwe na Argentine, Espagne, Ubudage, Chile, Brazil, Portugal, Columbia, Ubwongereza na Autriche mu myanya 10 ya mbere.

Muri Afurika, Cote d’Ivoire  ikurikiwe na Algeria, Ghana, Cape Verde, Tunisia, Senegal, Congo Brazaville, Guinea, Misiri na Cameroun mu 10 bya mbere.

Umwanya mwiza u Rwanda rwagize kuva mu 1993 ni uwa 64 rwagezeho muri Werurwe 2015 mu gihe umwanya mubi ari uwa 178 muri Nyakanga 1999.

NGABO Roben
UM– USEKE.RW