Nta ngabo twe tuzohereza mu zishobora kujya i Burundi – Kagame

Inama ya 13 y’Umushyikirano ishoje imirimo yayo, Perezida Kagame yakoranye ikiganiro ngarukakwezi ajya agirana n’abanyamakuru, ibibazo byinshi yabajijwe byagarutse ku bibazo biri i Burundi. Perezida Kagame yavuze ko abashinja u Rwanda kugira akaboko mu bibazo by’u Burundi bibeshya cyane kuko nta bimenyetso babigaragariza usibye kuvuga gusa, ndetse ngo u Rwanda ntabwo rwakohereza ingabo zarwo mu kifuzo gihari cyo kohereza ingabo mpuzamahanga kugarura amahoro i Burundi.

Ibibazo bya politiki byateye ubwicanyi n’ubuhunzi ku Barundi ibihumbi n’ubu bikomeje byakuruye umwuka mubi hagati y’u Rwanda n’u Burundi. Leta ya Bujumbura iganja iya Kigali uruhare mu biba i Burundi, gusa abayobozi b’u Rwanda bagaragaje kenshi ko ibibazo by’u Burundi ntaho bahuriye na byo ahubwo binagira ingaruka mbi ku Rwanda. Perezida Kagame yabigarutse birambuye yongeye kubibazwa uyu munsi.

Perezida Kagame yavuze ko ikibazo cy’u Burundi abayobozi b’u Rwanda batandukanye bakitayeho bakanakivugaho kuva kigitangira kuko cyahitanaga ubuzima bw’abantu benshi, cyane cyane Abarundi kandi ngo byashoboraga no gukwirakwira bikagera ku Rwanda nk’umuturanyi.

Avuga ko hari byinshi u Rwanda n’u Burundi bihuriyeho cyane ku buryo ibitagenze neza i Burundi bigira ingaruka ku Rwanda mu buryo bumwe cyangwa ubundi.

Ati “nk’uko mwanabibonye byagize ingaruka kuri bamwe mu banyarwanda… barafashwe barafungwa… bakorerwa iyicarubozo n’ubu hari abakiriyo, abahakoreraga, abahabaga n’ibindi…

Bimwe byanakorwaga nko kwihimura kubera ko twavugaga twemye ko hariyo ikibazo kandi Abarundi ubwabo ari bo bakwiye gutera intambwe yo kukikemurira kuko nta wundi urenze bo wo kukibakemurira.”

Perezida Kagame yakomeje agira ati “Navuze ko turi kwakira ibihumbi by’Abarundi bari guhunga baza hano…ntabwo wavuga ko ibihumbi by’abantu biri guhunga ubusa. Ntiwavuga ngo nta kibazo abantu bari guhunga, icyo gihe waba ufite ikibazo cyo kubona ko ufite ikibazo…”

Perezida Kagame yavuze ko ibyo bakomeje gusaba abayobozi b’u Burundi ari ukwirangiriza ibibazo byabo, bagaharika kuba abantu bicwa n’inzego za Leta, bagahagarika kwica urubozo abanyarwanda, bakita ku kibazo cy’ibihumbi by’impunzi z’Abarundi bari mu Rwanda no mu karere kuko ngo ari ikibazo kibareba.

Ati “…iki ntabwo ari ikibazo twifuzaga, ntabwo twakungukira mu kibazo cy’umuturanyi, ntabwo bishoboka… ahubwo ikibazo cy’umuturanyi natwe kitubaho ikibazo…n’ubu uwo mutwaro turawikoreye…ibyo rero byo kuregana njye mbibona nk’ibya cyaana, ngo impunzi ziri gufatwamo abajya mu nyeshyambaaaa….ngo u Rwanda rubaha intwaro…ngo abana b’abasirikare…kumva za NGOs zivuga gusa zishakisha aho zabona cyangwa zakwita ko harimo ibibazo…ni ibintu bya politiki gusa…. bidafite ibihamya na bito…kandi bitanatanga igisubizo ku kibazo ahubwo bituma Abarundi bakomeza kwibaza ko ikibazo bagiterwa koko n’abandi ntibatekereze ko bakwicara ngo bikemurire ikibazo cyabo.”

Akomeza agira ati “Ndetse ndashaka ko binasobanuka….ku cyifuzo cy’uko hari ingabo mpuzamahanga zakoherezwa mu Burundi kugarura amahoro…. ntabwo tuzaba tuzirimo…. dufite ingabo, dushobora kuzohereza ahatandukanye zikenewe ku isi kandi tukanarinda umutekano iwacu… ariko ntabwo tuzaba turi muri izo.(izakoherezwa i Burundi).

Ndetse n’umusanzu navugaga twatanga uzaba uri mu bundi buryo…Twatanga ingabo gusa igihe tuzisabwe, nta bushobozi burenzeho dufite bwo gukwirakwiza no kubatabukeneye…icyo mucyumve.”

U Burundi buri mu bibazo bya Politiki byakurikiwe n’imyigaragambyo n’ubwicanyi ku bantu babarirwa mu magana badashyigikiye Perezida Nkurunziza kuva mu kwezi kwa kane yatangaza ko aziyamamariza mandate ya gatatu kandi akaza no kuyitorerwa.

Impunzi zirenga 80 000 ubu ziri mu nkambi no mu mujyi ya Huye na Butare mu Rwanda.

UM– USEKE.RW