Somalia: Al-Shabaab yishe abasirikare ba Uganda barenga 40

Amakuru atangwa n’ibitangazamakuru bitandukanye harimo na CNN aravuga ko Al Shabab yahitanye ingabo za Uganda zigize umutwe wa AMISOM bagera kuri 45. Itangazo rya Al Shabab ryo rwemeza ko bishe abagera kuri 50.

Si ubwa mbere Al Shabab yigamba kwica zimwe mu ngabo za AMISOM kuko mu mezi ashize uyu mutwe washyize kuri Twitter urutonde rw’abasirikare 50 b’u Burundi bari muri AMISOM wishe ubaguye gitumo.

Al Shabab yarahiriye kuzihorera ku bihugu byose byohereje ingabo zabyo muri Somalia kuyirwanya kuko ngo baje kuyishotora kandi bagatera ubwoko bwa Allah.

Nyuma y’ibyabaye ejo, umugabo w’ingabo za Uganda, Gen Katuma Wamala yahise ajya Mogadishiu kufata mu mugongo abarokotse nubwo atatinzeyo nk’uko The Monitor yabyanditse.

Gusa ngo yabasezeranyije kuzagaruka vuba bishoboka bakigira hamwe icyakorwa.
Abarwanyi ba Al Shabab baguye gituma abasirikare ba Uganda bagize icyitwa Uganda Battle Group 14 kiri ahitwa Janaale.

Umwe mu basirikare bakuru ba UPDF( igisirikare cya Uganda) witwa Major Obbo avuga ko imibare itangazwa na Al Shabab ari amakabyankuru agamije kumvisha isi ko ikomeye.

Gusa ubu ngo UPDF iri kuganira n’Umuryango wa Africa(African Union) ngo barebe imibare bakwemeranywaho y’abasirikare ba Uganda bishwena Al Shabab babone kuyitangaza mu buryo budasubirwaho.

UM– USEKE.RW