Tanzania: LOWASSA wo mu ishyaka rya CCM agiye kujya muri CHADEMA bitajya imbizi

Ejo ku cyumweru hashize nibwo ishyaka riharanira Demokarasi n’imibereho myiza, Chadema (Chama cha Demokrasia na Maendeleo) ryari kwerekana ku mugaragaro Edward Lowassa, wabaye Minisitiri w’Intebe ari mu ishyaka riharanira impinduka CCM (Chama cha Mapinduzi), gusa ntibyashobotse kubera amakimbirane yavutse mu mpuzamashyaka, Ukawa (Umoja wa Katiba ya Wananchi).

Ishyaka rya Chadema ritajya imbizi n’Ubutegetsi bwa Chama cya Mapinduzi riyoboye muri Tanzania, ngo ryarangije ibiganiro na Edward Lowassa ndetse ngo yari kwerekanwa nk’umuyoboke mushya ku cyumweru ariko ntibyakunda.

Ikinyamakuru Mpekuzi kivuga ko amakuru yo mu ishyaka rya Chadema avuga ko Lowassa utagifitiye icyizere ishyaka yahozemo rya CCM nyuma yo kwimwa amahirwe yo kuzarihagararira mu matora y’umukuru w’igihugu, ashobora kuzerekanwa mu ishyaka rishya igihe icyo aricyo cyose muri iki cyumweru.

Umuvugizi w’ishyaka Chadema yabwiye iki kinyamakuru Mpekuzi ati “Kuba Lowassa yaza muri Chadema ntibikiri ibanga, ariko gahunda yo kumwerekana ntiyashobotse kubera inama zikomeye z’amashyaka abiri Chadema na CUF yombi ahuriye muri Ukawa.”

Ku cyumweru ishyaka Chadema ryakoze ihuriro rikomeye mu mujyi wa Dar es Salaam, mu gihe ku rundi ruhande ishyaka byiyunze rya CUF naryo ryakoze inama ikomeye mu gihugu cya Zanzibar, bose bigaga ku waba umukandida wabo mu ihuriro rya Ukawa.

Izi nama z’aya mashyaka yishyize hamwe zagombaga kurangira nimugoroba abayobozi bayo bakavugana n’abanyamakuru ariko ntibyashobotse.

Abantu ba hafi mu ishyaka rya CUF bavuga ko mu buyobozi bukuru bw’ishyaka ndetse n’Umuyobozi mukuru w’agateganyo Prof Ibrahim Lipumba, ntacyo baratangaza ku kuza kwa Prof Edward Lowassa mu ihuriro, Ukawa.

Kuza kwa Lowassa mu ihuriro ry’amashyaka atavuga rumwe na CCM iyoboye muri Tanzania byateje impagaragara, ndetse hari ababona ko CUF na Chadema bishobora gutandukana rimwe rikajya ukwaryo mu gihe Lowassa yaba yemerewe kuzahatana nk’umukuru w’igihugu ari ku ruhande rwa Chadema.

Umwe mu bayoboke ba CUF yagize ati “Bibaye ko Lipumba atiyamamaza ahubwo hakiyamamaza Lowassa anyuze muri Chadema nk’ishyaka ryo mu ihuriro, Ukawa, icyo gihe hazavuka ibibazo bikomeye kuko amafaranga yo kumushyigikira ni yo ishyaka rikoresha.”

Edward Lowassa ni umunyepolitiki uzwi cyane muri Tanzania akaba yarayoboye Minisiteri zinyura muri iki gihugu ndetse yanabaye Minisitiri w’Intebe.

Muri uyu mwaka abenshi mu baturage bari bazi ko Lowassa ariwe uzasimbura Jakaya Kikwete ariko ntiyigeze atorwa nk’uzahagararira ishyaka CCM mu matora y’Umukuru w’igihugu ateganyikwe mu kwezi kwa cumi muri uyu mwaka.

Ishyaka CCM ryahisemo Dr John Pombe Magufuli ngo azarihagararire, iyo ni yo mpamvu yatumye Prof Lowassa ajya mu ishyaka Chadema ritavuga rumwe n’ubutegetsi, bityo bitewe n’uko akunzwe na benshi mu baturage ashobora kuzahangana cyane na Magufuli ubwo azaba yemerewe kwiyamamaza.

UM– USEKE.RW