Ikibazo cy’amazi kimaze ibyumweru bibiri mu mujyi wa Rubavu

Iburengerazuba – Abatuye Umujyi wa Rubavu baganiriye n’Umuseke bavuga ko ikibazo cy’amazi kimaze gukomera kuko ubu kimaze ibyumweru bibiri, uduce tumwe na tumwe tw’umujyi nitwo dushobora kumara amasaha macye dufite amazi. Ababishinzwe baravuga ko ari ikibazo cy’imvura igwa muri Gishwati.

Mu duce dutandukanye tw’umujyi hari abavuga ko bamaze ibyumweru bibiri batazi amazi muri ‘robines’ zabo, abandi icyumweru, abandi bakavuga ko aza rimwe na rimwe mu gihe cy’amasaha macye, ubundi ngo akaza mu gicuku agahita agenda.

Umugezi wa Sebeya amazi yawo niyo atunganywa na station ya Rubavu akaba ariyo akwirakwizwa mu mujyi wa Rubavu n’inkengero zawo.

Tugirimana Francois wo mu Akagali k’Amahoro mu murenge wa Gisenyi, avuye kuvoma mu gitondo cyo kuri uyu wa 02 Ukwakira ati “ubu mu mujyi wose amazi ari ku karobine kamwe gusa hariya hafi y’isoko, ahandi hose ubu yabuze nahazengurutse na za Mbugangari hose hose ntayo.”

Kubura kw’amazi akaboneka hamwe na hamwe nabwo ntatinde biratuma abaturage bisanga bari kuvomera ahantu hamwe ari benshi cyane, kuyabona bikaba ingorabahizi. Ab’imbaraga babasha kuyavoma ijerekani imwe barayigurisha 200Rwf.

Hari amakuru ko bamwe bari kuvoma amazi y’ikiyaga cya Kivu bakayakoresha mu turimo tumwe na tumwe mu rugo.

Bahige Jean Berchimas Umuyobozi w’ishami rya Rubavu rya EWSA yabwiye umunyamakuru w’Umuseke i Rubavu ko imvura nyinshi iri kugwa mu by’ishyamba rya Gishwati imanura (muri Sebeya) amazi yanduye menshi kuyayungurura bikananirana.

Uyu muyobozi avuga ko atazi igihe iki kibazo kizarangirira kuko ngo atazi igihe imvura izamara igwa.

Patrick MAISHA
UM– USEKE.RW/Rubavu