Umugore n’umunyeshuri wa kaminuza bafatanywe udupfunyika 112 tw’urumogi

Gasabo – Kuri uyu wa 25 Kamena, mu kagali ka Masoro mu mudugudu wa Mubuga hafatiwe urumogi udupfunyika 112 dufite agaciro k’Amafaranga ibihumbi 300 y’u Rwanda. Agapfunyika  kamwe ngo gahagaze  amafaranga 300. Mu bafashwe muri iki gikorwa harimo umugore ukiri muto warucuruzaga, umusore waruranguraga ndetse n’abasore babiri barunywaga barimo umunyeshuri muri Kaminuza y’Abadventisiti ya Mudende.

Zacharie Habumuremyi arashinjwa kuba ariwe urugemura, akaruzanira uyu mugore nawe urucuruza buhoro buhoro. Habumuremyi yabwiye Umuseke ko we yaruzanye hari urumuhaye ngo aruzanire uyu mugore we nta yindi nyungu abifitemo.

Uyu mugore ukiri muto wariraga cyane ubwo bamutaga muri yombi yavugaga ko gucuruza urumogi abiterwa n’ubukene no kuba ari impfubyi.

Ati “nta mugabo ngira, ndi impfubyi nta muryango wi kunyitaho. Niyo mpamvu mba nshaka imibereho.” Avuga ko ari umuntu ngo wamwigishije uko bashaka iyo mibereho mu gucuruza urumogi.

Habineza Edison umuyobozi w’Akagali ka Masoro avuga ko ubuyobizi bwahawe  amakuru  n’abaturage ndetse bamenya n’amasaha urugemura aruzaniraho maze nabo babagwa gitumo bahita babafata, yaba uwarurushoye, uwaruranguraga n’aba basore bariho barutumura.

Habineza avuga ko bari bafite amakuru y’uko hari umuntu uzana urumogi nk’urushoye mu mudugudu wabo ndetse n’abagura ibipfunyika byarwo bagasigara barugurisha mu rubyiruko rumwe rw’aha hafi. Gusa ngo bari batarabona amakuru yose ngo babafate.

Ati “Turakomeza gukangurira  abaturage gukomeza ubufatanye nk’ubu bwo kurwanya ibiyobyabwenge kuko ingaruka zabyo mbi zitugeraho twese hamwe.”

Habineza avuga ko n’ahandi hose hagiye hari abacuruza urumogi hano mu gace bagiye gukomeza kubahiga no kubata muri yombi bagashyikirizwa ubutabera bafatanyije n’inzego za polisi zibishinzwe.

Polisi y’u Rwanda imaze igihe muri gahunda yo gukangurira abanyarwanda cyane cyane urubyiruko kwirinda ibiyobyabwenge ubu bifatwa nk’intandaro y’ibyaha birimo urugomo n’ubwicanyi bwa hato na hato.

Urumogi, Siriduwire, Mayirungi, Mugo n’ibindi ni bimwe mu biyobyabwenge bivugwa ko muri iki gihe bikoreshwa na bamwe mu rubyiruko ndetse na bamwe mu bakuze.

Mu duce tumwe na tumwe i Kigali nka Nyamirambo, Biryogo, Matimba, Migina, Giporoso, ahitwa Coridor mu Giporoso, Rwampala na Gikondo CGM ngo ni hamwe mu higanje urumogi n’ibindi biyobyabwenge.

Abaturage basabwa kugira uruhare mu gutunga agatoki aho bikoresherezwa, aho bicururizwa cyangwa abitwa ko babigemura mu duce runaka kuko ngo ingaruka zigera ku muryango nyarwanda wose.

Photos/Eric Birori/UM– USEKE

BIRORI Eric
ububiko.umusekehost.com