Airtel izanye Tony Adams gusura u Rwanda ku bufatanye na Arsenal

Mu cyumweru gitaha Airtel ifatanyije n’ikipe yo mu Bwongereza Arsenal izazanira abakunzi b’umupira w’amaguru muri rusange n’abafana ba Arsenal by’umwihariko  Tony Adams wahoze ari umukinnyi wa Arsenal akaza no kuyitoza.

Uyu mugabo mu myaka 19 yamaze akinira Arsenal yatsindiye ibikombe 10 mu bihe bitandukanye byaranze ubuzima bwe muri Football.

 Tony azaba ari mu Rwanda guhera ku italiki ya mbere Gicurasi ndetse azaba aherekejwe n’itsinda ry’abaganga baturutse muri Arsenal baje kugorora imitsi y’urubyiruko rukina Football ruturuka mu bihugu by’ u Rwanda, Uganda, Nijeriya, Gana na Zambiya.

Uru rubyiruko rugize amakipe yitwaye neza mu mwaka ushize ubwo habaga amarushanwa yo kureba abafite impano yo gukina Football muri ibi bihugu kurusha abandi.

Mu ruzinduko rwe Tonny Adams hamwe n’abatoza baturutse mu ishuri rya Arsenal ryigisha umupira w’amaguru, azasangiza ubunararibonye bwe abatoza 30 batoranyijwe muri biriya bihugu.

Ukuriye Airtel mu Rwanda Teddy Bhullar yishimiye ubu bufatanye na Arsenal, avuga ko ari ibintu by’agaciro kwakira umuntu nka Adams mu Rwanda.

Bhullar yongeyeho ko muri gahunda za Tony Adams harimo no kuzishimana n’abafana ba Arsenal baba mu Rwanda.

ububiko.umusekehost.com