2014/15: Imishinga idindira yahombeje miliyari 154 Frw avuye kuri miliyoni 126

*Umugenzuzi w’Imari yatanze inama ku bikorwa 2 160 hubahirizwa muri 1177

Basuzuma raporo y’umugenzuzi w’imari ya Leta ya 2014-2015, Abasenateri bagize Komisiyo y’Iterambere ry’ubukungu n’imari, bagaragaje ko mu ngengo y’imari y’uyu mwaka wa 2014-2015 amasezerano y’imishinga 131 yadindiye bigatera igihombo cya miliyari zisaga 154 Frw mu gihe mu mwaka wa 2013-2014 hari hagaragaye amasezerano 77 yari yadindiye agahombya miliyoni 126 Frw.

Abasenateri bagize komisiyo y’Iterambere ry’ubukungu n’imari bagarutse ku bwiyongere bukabije bw’amasezerano akomeje kudindira ntakorerwe ku gihe, bavuga ko ibi bikomeje kugusha Leta mu gihombo.

Bagaruka ku bikubiye muri iyi raporo bariho basuzuma, bavuze ko mu mwaka w’ingengo y’imari wa 2014-2015, amasezerano 131 atashyiriwe mu bikorwa ku gihe bigatera igihombo cy’amafaranga 154 963 536 476 Frw.

Aba bashingamategeko basaga nk’abatunguwe n’ubwiyongere bukabije muri aya masezerano akomeza kudindira bigatuma Leta ikomeza guhomba, bavuze ko mu mwaka wa 2013-2014, amasezerano yari yagaragayemo ubukererwe yari 77 yari yateje igihombo cya miliyoni 126.

Muri aya masezerano yagarageyemo ubukererwe, arimo ay’imishinga yo kubaka ibikorwa remezo nk’imihanda n’imishinga yo gutunganya ingufu z’amashanyarazi.

Ubu bugenzuzi bwakorewe ibigo 151 bya Leta, bugaragaza ko bimwe muri ibi bigo byagaragaweho amakosa yo gutunga ibikoresho bitabyazwa umusaruro.

Iyi raporo igaragaza ko ibi bikoresho biba bibitse bidakoreshwa, byateje igihombo cya miliyari 7 na miliyoni 920. z’amafaranga y’u Rwanda

Abasenateri bagarutse ku kigo gishinzwe kugenzura ingufu z’amashanyarazi n’amazi cyubatse ibigega I Nyarutarama bimaze imyaka ibiri bitarashyirwamo amazi.

Ikigo cy’igihugu cy’Uburezi REB na cyo kiri mu bigo byagaragaweho amakosa nk’aya yo gupfusha ubusa umutungo w’igihugu, gitungwa agatoki kutubahirirza gahunda ya mudasobwa kuri buri mwana (One Laptop for Child) aho bagaragaza ko izi mudasobwa zaheze mu bikarito.

Ikigo cy’igihugu cy’ubuzima nacyo kigarukwaho muri iyi Raporo, gishinjwa gusesagura umutungo wa Leta kigura imiti myinshi ndetse imwe muri yo iba yararangije igihe.

Abasenateri kandi bagarutse ku ruganda rutunganya umusaruro w’imyumbati rwa Ngororero rumaze imyaka ibiri rutabyazwa umusaruro nyamara rwaraguze imashini zatwaye amamiliyoni n’amamiliyoni.

Bavuze ko bimwe mu bigo bya Leta bigura ibikoresho bitabanje gukora igenamigambi rinoze kuko bigura ibikoresho bidakenewe.

Perezida w’iyi komisiyo yasuzumaga iyi Raporo, Muhongayire Jacqueline yavuze ko bagiye gutumiza umugenzuzi mukuru w’imari ya Leta akabasobanurira neza iby’iyi raporo kuko amakosa yagarutse mu mwaka wa 2014-2015 ari kimwe n’ayagaragaye mu mwaka wawubanjirije.

Ati ” ubu gufafa imyanzuro byatugora kuko amakosa y’imicungire y’imari ya leta twabonye muri raporo y’umwaka ushize n’ubundi ni yo twabonye

Akomeza agira ati “…Tukaba rero tugiye gutumaho umugenzuzi mukuru akazaza kadusobanurira iyi raporo neza byaba ngombwa natwe tukajya kwirebera igituma cyane cyane nk’amakosa y’ikoreshwa nabi ry’umutungo wa leta n’ibindi bihora bigaruka.”

Iyi raporo kandi igaragaza ko mu mwaka wa 2013-2014, Umugenzuzi mukuru w’Imari yari yatanze inama mu bikorwa 2 160 ariko ko ibyashyizwe mu bikorwa ari 1 177, naho ibitarashyizwe mu bikorwa ni 662.

Josiane UWANYIRIGIRA
UM– USEKE.RW