2.2MW zo kuri Rukarara II, intambwe yatewe ku mashanyarazi ariko akiri macye

Abaturage bo mu murenge wa Uwinkindi mu karere ka Nyamagabe babwiye Umuseke ko bishimiye kuzura k’urugomero rw’amashanyarazi rwa Rukarara ya kabiri rwamuritswe kuri uyu wa kane ruri iwabo ubu rutanga Megawatt 2.2 z’amashanayarazi, gusa bagasaba ko aya mashanyarazi nayo yabagezwaho cyane cyane abaruturiye insinga ziyajyana zica hejuru.

Mu Rwanda imibare igaragaza ko abarutuye bafite amashanyarazi ari 18% gusa, mu mwaka wa 2017 abayobozi bavuga ko bifuza ko uyu mubare ugera kuri 70%, ni intego itoroshye ariko ngo ishoboka kubera ingomero zitandukanye ziri kubakwa, ndetse n’amashanyarazi ashobora kuvanwa vuba aha muri gazi methane yo mu kiyaga cya Kivu.

Abanyarwanda bafite amashanyarazi nabo usanga abo mu bice bimwe na bimwe binubira ko acikagurika kenshi. Ikibazo cy’amashanyarazi kiracyari cyose nk’uko iriya mibare (18%) ibigaragaza, ariko ikizere nacyo gisa n’aho ari cyose.

Iki kizere cyabonekaga ku maso y’abaturage y’abaturage mu murenge wa Uwinkindi babwiwe n’abayobozi ko aya mashanyarazi nabo agomba kubageraho bakayakoresha kuko abenshi ntayo bafite ubu.

Uru rugomero rwubatswe na Leta y’u Rwanda ku bufatanye n’ikigo cy’iterambere mpuzamahanga cy’ababiligi CTB ndetse n’Umuryango w’Ubumwe bw’Uburayi, UE, rwuzuye rutwaye miliyoni icyenda z’ama Euro, ni asaga miliyari umunani zirenga z’amanyarwanda.

Mu muhango wo gutaha uru rugomero wari witabiriwe n’abayobozi benshi, Prof Silas Lwakabamba Ministre w’ibikorwa remezo yavuze ko Leta itanga ikizere ku banyarwanda ko ikibazo cy’amashanyarazi kitaweho cyane kandi kizakemuka mu gihe kiri imbere kitari kirekire cyane.

Umuyobozi w’Intara y’Amajyepfo Alphose Munyatwari we mu ijambo rye yagarutse cyane ku kuba ibikorwa nk’ibi byiza bigerwaho ahanini kubera umutekano n’icyerekezo cyiza u Rwanda rufite, gitangwa n’ubuyobozi bwiza.

Abwira abari aho yagize ati « Umuriro w’amashanyarazi ni inkingi iganisha ku iterambere rirambye, Leta mubona ko yashyize imberaga mu kuwongera no kuwugeza ku banyarwanda. Ariko ibi byose ntabwo byagerwaho nta mutekano usesuye uhari niyo mpamvu aricyo kintu cya mbere tugomba gukomeza kubumbatira. 

Umutekano ni  icyatumye Abana b’u Rwanda bose babasha kwiga amashuri 12 y’ibanze, ni icyatumye Abanyarwanda borozwa bagatunga inka ari benshi kandi gahunda igikomeza, ni icyatumye Abanyarwanda babasha kwivuza ari benshi, ni icyazanye VUP, ni icyazanye SACCO, ni icyatumye abanyarwanda twese tugira telephone, nabonye hano buri wese afotora, anafata amajwi».

Michael Ryan uhagarariye umuryango w’ubumwe bw’ibihugu by’uburayi mu Rwanda yavuze ko bashimira icyo inkunga batanze yagezeho kigaragara, yavuze ko umuriro w’amashanyarazi mu Rwanda ukiri mucye ariko bazakomeza gufatanya na Leta y’u Rwanda kugira amashanyarazi ahagije abanyarwanda.

Martin NIYONKURU
ububiko.umusekehost.com