Zone V: CSK yasezerewe, Espoir BBC yongera amahirwe

Kuri uyu wa gatatu kuri stade ntoya ya Remera hakomeje imikino y’akarere ka gatanu ihuza amakipe yabaye aya mbere iwayo (FIBA Africa Zone Five Club Championships) amakipe ahagarariye u Rwanda yakinnye ahatanira ticket imyanya yo kujya mu gikombe cya Africa ku bagabo n’abagore, imikino izabera muri Angola mu mpera z’uyu mwaka. Espoir BBC yiyongereye amahirwe itsinda umukino yari ifite.

Ikipe ya CSK yaherukaga gutsindwa bikomeye na Gezira yo mu Misiri, uyu munsi yakinnye na KPA BBC yo muri Kenya, CSK yongera guhura n’akaga kuko ku manota 83-64, ikipe ya CSK ihita isezererwa mu irushanwa.

KPA yatsinze uduce twose muri uwo mukino, aka mbere yagatsinze ku manota 18-16, aka kabiri 17-14, aka gatatu 27-17 naho aka kane ku manota 21-17. A

bakinnyi batsinze amanota menshi muri uyu mukino ni, Mike Buzangu wa CSK watsinze amanota 36, Odombe wa KPA watsinze amanota 16, na Leting wa KPA watsinze amanota 12.

Nyuma yaho hatangiye umukino wahuje Espoir BBC na Savio BBC yo muri Tanzania, umukino witabiriwe n’abantu benshi bakunda Basketball. Espoir ntiyabatengushye kuko yawutsinze ku manota 75 kuri 56 ya Savio.

Abatsinze amanota menshi ni Lionnel Hakizimana  na Ngandu Bienvenu bombi batsinze amanota 19.

Ku ruhande rw’abagore umukino witabiriwe cyane kani wari unogeye ijisho ni uwahuje APR BBC yanatwaye igikombe cya shampionat n’ikipe y’Ubumwe BBC. Aya makipe yombi yakinnyi umukino mwiza APR iguma imbere ya Ubumwe ho amanota macye ariko umukino ugiye kurangira Ubumwe BBC ikora amanota akenewe cyane ihita isiga APR ho amanota atanu.

Mu bagore ariko amakipe yo mu Rwanda ntabwo yorohewe kuko amaze gutsindwa n’ikipe za Berco Star y’i Burundi na KCCA yo muri Uganda zihabwa amahirwe kurusha izindi muri iki kiciro.

Uko imikino yagenze mu bagabo kuri uyu wa gatatu:
GEZIRA (Egypt) 99-50 NEFL (South Sudan)
CSK (Rwanda) 64-83 KPA (Kenya)
Savio (Tanzania) 56-75 Espor (Rwanda)
Ulinzi (Kenya) 63-82 City Oilers (Uganda)

Uko imikino yagenze mu bagore:
KCCA (Uganda) 50-39 Don Bosco
Ubumwe BBC 63-58APR BBC
Breco Stars (Burundi) 65-70 USIU (Kenya)

John Bahufite utoza Espoir yavuze ko uyu mukino batsinze ubongereye ikizere cyo gukomeza gushaka igikombe no guhatana.

Avuga ko azi neza ko ikipe ya Gezira yo mu Misiri ariyo ihabwa amahirwe menshi, ariko ati “Yego Gezira irakomeye, ariko duhuye nayo nibwo mwabona ko natwe dushaka igikombe. Tuzahatana mpaka ku isegonda rya nyuma kandi ikizere ni cyose mu ikipe yanjye.”

Ikipe zizaba iza mbere muri aya marushanwa zizahagararira aka karere ka gatanu mu marushanwa ya Africa azabera muri Angola.

Imikino iteganyijwe kuri uyu wa kane, ku munsi wa gatanu w’irushanwa:

12:00 -Berco Star vs APR (abagore)
2:00pm-DonBosco vs Ubumwe (abagore)
2:00 pm – Savio vs City Oilers (abagabo)
4:00 pm -Dynamo vs Ulinzi (abagabo)
4:00 pm – KCCA vs USIU(abagore)
6:00 pm – CSK vs NFEL (abagabo)
8:00 pm -Gezira vs Tiger Head Power (abagabo)

Imikino ya kimwe cya kabiri n’iyo gushyirwa ku rutonde (classification) itegerejwe ejo kuwa gatanu)

UM– USEKE.RW