Week end y'ibirori muri Zimbabwe: Mugabe yujuje 90

Perezida w’igihugu cya Zimbabwe Robert Mugabe kuri uyu wa gatanu tariki 21 arizihiza isabukuru  imyaka 90 y’amavuko. Muri Zimbabwe hateganyijwe ko iyi week end iza kuba iyo kwishimira kuramba kw’uyu muyobozi wabo. Yabayeho umwalimu, yafunzwe imyaka 11, yarwanye urugamba rwa indepandansi, nyuma aba Perezida, ni umukambwe ugarukwaho cyane ubu.

Mugabe uzwiho kuba umuyoboke w’idini Gatulika  yagize ati:”Si nzi impamvu nabayeho igihe kirekire. Ni ubushake bw’Imana”.  

Umukambwe Mugabe akomeje kuvugwaho kugundira ubutegetsi  ngo ubuzima bwe ntibumworoheye aho benshi bavuga ko arwaye kanseri  yafashe  bimwe mu bice by’ubugabo bikaba bituma ahora mu gihugu cya Singapour gushaka inzobere z’abaganga.

Mugabe yongeye gutorerwa manda y’imyaka itanu mu mwaka ushize wa  2013. Nubwo abatavuga rumwe nawe bari bahagurutse cyane.

Gutorwa kwa Mugabe  nti kwakiriwe neza n’abamurwanya ndetse n’abarwanya ubutegetsi bwa Zimbabwe muri rusange .

Mugabe ariko mu mahanga uko avugwa siko mu gihugu avugwa kuko ngo yaba akunzwe n’abanyazimbabwe benshi cyane bamubonamo nk’umubyeyi w’igihugu.

Bimwe mu bitaravuzwe cyane kuri we:

* Akunda cyane siporo: Mu myaka itatu ishize, yavuze ko iyo atakoze siporo aribwo arwara. Abyuka hagati ya saa kumi na saa kumi n’imwe agakora siporo yikoresheje. Yanga cyane ibyoma byabugenewe (Gym) byashyizwe mu ngoro ye n’umugore we. Avuga ko igihe yari afunze bikoreshaga siporo ubwabo badakeneye ibyo byuma by’abazungu. Kuramba kwe kandi ngo agukesha ibiryo gakondo byitwa sadza.

*Akunda cyane umukino wa Cricket, yavuze ko ari umukino w’abantu b’inyangamugayo. Nyuma cyane y’uko Zimbabwe ibonye ubwigenge yavuze ko yumva abanyazimbabwe bose bakwiye gukina Cricket bakaba inyangamugayo. Akiri umwana ariko ngo yakinaga Tennis. Akunda kwirebera ariko na Football ngo akaba umufana cyane wa Chelsea na Barcelona. Mu 2012 yatangaje ko iyo areba ruhago ntawumukubaganira, ngo kuko iyo batera umupira batsinda nawe atabura ibyo atera mu nzu.

* Yemera cyane Kwame Nkrumah: Avuga ko ariwe yavanyeho intekerezo zo guharanira ubwigenge bwa Zimbabwe. Avuga ko yatekereje nka Nkrumah ubwo yari muri Ghana ari umwalimu ari naho yahuriye n’umugore we. Ageze iwabo nyuma y’imyaka ibiri ngo yatangiye kubwira abanyazimbabwe uburyo muri Ghana abantu baho bigenga.

* Afite impamyabumenyi zirindwi. Yize muri kaminuza ya Fort Hare,kaminuza  ni yo yonyine yemeraga abanyeshuri b’Abirabura mu gihe cy’ingoma ya Gashakabuhake, ari nayo Nelson Mandela yizeho. Yabonye zimwe muri izi mpamyabumenyi azivanye muri gereza aho yigaga iyakure (a distance), afite impamyabumenyi mu Uburezi, ‘administration’, siyansi n’amategeko. Za kaminuza nyinshi zamuhaye impamyabumenyi z’ikirenga z’icyubahiro hambere kubera guteza imbere igihugu cye, nubwo umwamikazi w’Abongereza yamwambuye yahawe n’Ubwami bw’Abongereza.

* Yabyaye ku myaka 73. Hari abavuga ko Mugabe atabyara, sibyo. Umwana we w’imfura Nhamodzenyika, yitabye Imana azize Malaria ubwo bari muri Ghana. Ku mugore we wa kabiri (wahoze ari umunyamabanga we) babyaranye abana batatu, uwa gatatu bamubyaranye mu 1997, Mugabe yari afite imyaka 73.

Mugabe wavutse tariki 21 Gashyantare 1924, ubuzima bwe bwaranzwe no kuba umuntu ukunda gushyira hamwe  no kuba umuhanga mu ishuri kuko yabonye impamyabumenyi  zirindwi  z’icyiciro cya kabiri   cya Kaminuza n’impamyabumyi y’icyiciro cya gatatu  cya Kaminuza mu by’amategeko  .

Mugabe yaharaniye ubwigenge bwa Zimbabwe ashirwa abigezeho,  atangira kuyobora mu mwaka w’1980 kugeza ubu.

ububiko.umusekehost.com