Young Grace niwe usimbuye Knowless muri PGGSS 4

Hari hategerejwe kumenya umuhanzi usimbura Knowless mu bakobwa bagera kuri batatu bari batoranyijwe mu bahanzi 15, Young Grace niwe uhawe ayo mahirwe yo gusimbura Knowless nk’uko byemejwe kuri uyu wa 07 Werurwe.

Kuva Knowless yasezera muri iri rushanwa, abakurikirana ibya muzika mu Rwanda bari bamaze iminsi banuganuga ko Young Grace ari we ushobora kumusimbura.

Mushyoma Joseph uzwi cyane nka Boubou umuyobozi wa East African Promoters (EAP) ifatanya na BRALIRWA gutegura Primus Guma Guma Super Star, yabwiye Umuseke ko Young Grace ariwe wakurikiraga mu majwi y’abatoye inyuma ya Knowless, Paccy na Teta.

Young Grace ngo agomba gutangirana n’abandi imyitozo (repetition) bo bamaze gukora inshuro eshatu.

Guhera ku wa mbere kugeza ku wa gatanu uyu muhanzi azaba akora buri munsi kugirango anganye n’abandi inshuro bamaze gukora repetition adahari.

Biteganyijwe ko ku itariki ya 15 Wwerurwe 2014 aribwo hazaba igitaramo cyo gutoranya abahanzi 10 bazaba bemerewe kwitabira irushanwa rya Primus Guma Guma Super Star IV kikazabera i Gikondo ahasanzwe habera Expo.

Young Grace yagaragaye muri PGGSS II mu 2012, ntabwo yigeze abona amahirwe yo kugaruka muri PGGSS III.

Kuva iri rushanwa ryatangira umukobwa wabashije kugera kuri ni Knowless waje muri batanu ba mbere ubushize. Uyu mwaka kuva yasezera bamwe bavuga ko amahirwe ari menshi ko rizongera rikegukanwa n’umuhanzi w’igitsina gabo kuko Knowless ari mu bahabwaga amahirwe.

Umwaka ushize muri PGGSS III ubwo Young Grace atazaga mu bahanzi bahatanaga yasabye abafana be gishigikira Knowless, ndetse anasaba abategura iri rusanwa kutagira amarangamutima na macye bakoresha.

Knowless ubwo yasezeraga mu ntangiriro z’iki cyumweru, yasabye abafana be gushyigikira abahanzi b’abakobwa bari muri iri rushanwa, Young Grace yiyongereye kuri Teta, Pacy.

Joel Rutaganda
ububiko.umusekehost.com