Visi Pereziza wa Rayon Sports Gakumba yeguye

Uwari Visi Perezida wa Rayon Sport Gakumba Jean Claude  yeguye kuri uyu mwanya kubera impamvu  avuga ko ari ize bwite zirimo  ngo gukomeza amasomo mu cyiciro cya gatatu cya Kaminuza.

Gakumba Jean Claude yinjiye muri komite nyobozi ya Rayon Sports muri Nzeli 2012 yeguye nyuma gato y’uko  ikipe ya APR FC yaherukaga kubatsinda ibitego 4-0 ku munsi wa 18 wa Shampiyona nyarwanda kugeza n’ uyu munsi itabona umuterankunga.

Ku rukuta rwe rwa Facebook yanditse ati: “ Nshobora kuba hari ibyo nafashije nk’uko hari ibyo naba ntaratunganyije neza, hakosa uwakoze!  Mbashimiye uburyo twakoranye. Imana ibane namwe”

Mutarama 2015, ubwo Rayon Sports yagurishaga ba myugariro Sibomana Abuba w’ Umunyarwanda  na Nizigiyimana Kharim w’ Umurundi muri Gor Mahia yo mu gihugu cya Kenya  Gakumba yanenzwe amagambo yanditse agira ati:  “Iyo umutunzi yabonaga inka itangiye gusenya ikiraro yahitagamo kuyishora ku isoko bakamuha make.”

Aya magambo yarakaje bamwe mu bakinnyi  n’abafana ba Rayon Sports.

Ubuyobozi bwa Rayon Sports buvuga ko butiteguye guhita busimbuza Gakumba Jean Claude kubera ko ngo na Gakwaya Olivier wari umunyamabanga w’ ikipe akaza kwegura nyuma yo guhagarikwa n’Ishyirahamwe ry’umupira w’amaguru mu Rwanda (FERWAFA) mu 2014 atahise asimbuzwa byihuse.

Gakumba wari umuyobozi ushinzwe imiyoborere n’imibereho myiza y’abaturage mu Ntara y’Amajyepfo avuye muri Rayon Sports mu gihe hari hasigaye amasezerano y’imyaka ibiri iyi kipe yari ifitanye n’akarere ka Nyanza ngo arangire.

Uyu Gakumba Jean Claude asize Rayon sports ku mwanya wa gatanu n’amanota  25, irushwa na mukeba wayo APR Fc  amanota 13.

Andi makuru ari kuvugwa ni uko ngo iyi kipe ifite ikibazo cy’amikoro ishobora kutazakina umukino wo kwishyura n’ ikipe ya  Panthère du Nde yo muri Cameroun mu marushanwa ya Confederation Cup.

Gakumba  Jean Claude yinjiye buyobozi bwa Gikundiro ariyo Rayon Sports muri Nzeli 2012 yeguye mu gihe APR FC yaherukaga kuyitsinda  ibitego 4-0 ku munsi wa 18 wa Shampiyona nyarwanda..

NSENGIYUMVA Faustin

UM– USEKE.RW