Uwunganira Frank Rusagara uyu munsi niwe wabuze mu rukiko

Mu rubanza Ubushinacyaha bwa Gisirikare buregamo Col Tom Byabagamba na bagenzi be ibyaha birimo “Gusuzugura ibendera ry’Igihugu no kwangisha Abaturage ubutegetsi buriho; kuri uyu wa 29 Kamena, umwe mu baregwa yabwiye Urukiko ko atashobora kuburana kubera uburwayi, naho Abavoka bitabiriye iburanisha bavuga ko batamenyeshejwe mu nzira nyayo ibyemezo bafatiwe bityo urubanza rurasubikwa kuko batari bishyura amande baciwe. Umwunganizi wa Rusagara we ntiyigeze ahahinguka.

Saa yine na 45 nibwo abacamanza binjiye mu cyumba cy’iburanisha kuri uyu wa mbere. Frank Rusagara niwe mu baregwa winjiye adafite umwunganizi mu mategeko, umwunganizi we yavuze ko atazagaruka mu rukiko icyifuzo cyabo kitumviswe.

Iburanisha riheruka ryahagaze kuko abunganira abaregwa batari baryitabiriye ndetse bacibwa n’ibihumbi 300 kuri buri umwe by’amande mbonezamubano yo gutinza urubanza ku bushake batanatanze impamvu.

Mu iburanisha rya none; Umucamanza yabanje kugaragaza ko mu gitondo cyo kuri uyu wa mbere Urukiko rwakiriye ibaruha yanditswe na Sgt Kabayiza Francois (Rtd) asaba ko urubanza rwasubikwa kuko ubuzima bwe bugeramiwe kubera uburwayi bwo gususumira amaranye igihe ndetse n’imiti ahabwa ituma acika intege.

Nta mpaka ndende zagiwe kuri ubu busabe gusa ubwo yabazwaga icyakorwa ku cyifuzo cy’uwo yunganira; Nkuba Milton wunganira Kabayiza yabanje gusabwa kubanza kwerekana aho yishyiriye amande yaciwe asubiza ko atigeze amenyeshwa iby’icyemezo yafatiwe gusa ko yawumvise ndetse akaba awujurira.

Nkuba Milton ati “ Ntabyo nakoze kuko byanafashweho icyemezo ntahari, mu buryo buri Formulaire (bugiye umujyo umwe) nibwo nkimenya ko naciwe amande.”

Nkuba yahise asaba umwanditsi w’Urukiko kumwandikira ko ajuririye iki cyemezo gusa Umucamanza amwibutsa ko iki cyemezo kitajuririrwa, ariko ntiyashirwa avuga ko azajurira urukiko rw’Ikirenga ahita anasaba Urukiko gufata ko ubwo bujurire bwe buhari kuko icyemezo yafatiwe kinyuranyije n’amategeko.

Mugenzi we; Me Valerie Gakunzi ntibahuje dore ko yavuze ko iki cyemezo cyubahirije amategeko ariko ko nawe atakimenyeshejwe mu buryo bugenwa n’itegeko.

Me Gakunzi ati “…jye ndemera ko cyafashwe hakurikijwe amategeko ariko nacyumvise muri media, ntabwo Urukiko rwatanze notification (icyemezo cyo mu nzira z’amategeko) yacyo.”

Ubushinjacyaha bwakunze kugaragaza ko imyitwarire y’ababuranyi n’ababunganira igamije gutinza urubanza, kuri uyu wa mbere bwongeye kubigarukaho buvuga ko ibi byo kuba abavoka batishyura amande baciwe nabyo bigamije kudindiza urubanza.

Ubushinjacyaha bwahise bunagaruka kuri Me Buhuru Pierre Celestin, wunganira Frank Rusagara, utagaragaye mu iburanisha aho bwavuze ko akwiye kuzabibazwa ubwo azaba yitabiriye iburanisha.

Abajijwe amakuru y’umwunganizi we utitabye Urukiko; Brig Gen Frank Rusagara (Rtd) yasobanuriye Urukiko ko mu iburanisha riheruka Me Buhuru yavuze ko yajuririye icyemezo cyafatiwe umukiliya we (cyo gutandukanya imanza) ndetse avuga ko atazongera kwitaba uru rukiko mugihe Urukiko rw’Ikirenga rutagitanzeho icyemezo bityo ko ari yo mpamvu ashobora kuba atagaragaye mu iburanisha rya none.

Urukiko rwashise rusobanurira uregwa ko mu gihe izi manza zidahuje ikiburanywa; Me Buhuru agomba kwitaba muri uru rubanza gusa Ubushinjacyaha buvuga ko iyi myitwarire ya Buhuru nayo igamije gutinza urubanza kuko idakwiye umunyamategeko nkawe.

Abajijwe niba ashobora kuzashaka undi mwunganizi mu gihe Me Buhuru yaba atagarutse; Frank Rusagara yagize ati “ …Byantwara igihe ariko icyo urukiko rwategeko nicyo nakora.”

Ikibazo cy’amande; Me Gakunzi Valeri yashatse kukigarukaho inshuro nyinshi gusa Umucamanza akamuhagarika amubwira ko iki cyemezo kitagibwaho impaka ndetse yibutsa abo cyafatiwe ko ubundi bakwiye kucyubahiriza kikimara gufatwa.

Ni nayo ntandandaro yonyine yatumye Urubanza rusubikwa kuko uburwayi bwa Kabayiza; umucamanza yavuze ko butahagarika urubanza kuko ibyaha baregwa bidakomeye.

Umucamanza yavuze ko ingingo y’ 147 mu gitabo cy’amategeko agenga imiburanishirize y’imanza z’Inshinjabyaha ingena ko mu gihe abantu bakurkiranyweho ibirego bitarenza igihano cy’imyaka itanu y’igifungo; uregwa ashobora kohereza umwunganira mu gihe we yaba ari ahantu hazwi.

Umucamanza yimuriye iburanisha ku itari 24 Nyakanga nyuma yo kubyumvikanaho n’impande zombi (Ubushinjacyaha; abaregwa n’ababunganira).

Martin NIYONKURU & Jean Paul NKUNDINEZA
UM– USEKE.RW