Urukiko rw’Uburayi rwahanaguyeho icyaha uwavugwagaho guhakana Jenoside yakorewe Abanyarumeniya

Urukiko rw’Uburayi rushinzwe kurengera uburenganzira bw’ikiremwamuntu ruherereya i Strasbourg mu Bufaransa, rwemeje ko ibivugwa n’umunyapolitiki wo muri Turikiya witwa Dogu Perincek ko nta Jenoside yakorewe Abanyarumeniya yabayeho bifite ishingiro.

Ubwicanyi bwakorewe Abanyarumeniya bamwe bita Jenoside bwabaye mu 1915, bukozwe n’Ubwami bw’Abami bw’Aba-Ottoman, ubu igice kinini cyabwo cyahindutse Turukiya.

Urukiko rwemeje ko abagejeje uriya mugabo imbere y’inkiko bamurega ko yahakanye Jenoside yakorewe Abanyarumeniya bamurenganije nk’uko AFP yabyanditse.

Abacamanza 7 ku icumi bemeje ko uriya mugabo arengana, bityo umwanzuro uba uw’uko arekurwa. Dogu Perincek ngo yigeze kuvuga ko gushinja Turikiya Jenoside ari ‘ikinyoma mpuzamahanga’.

Perincek ukuriye ishyaka Patriotic Party yaburanishijwe muri 2007 n’Urukiko rwo mu Busuwisi rwemeza ko acibwa amande, ariko aza kujurira mu rukiko rw’Uburayi rurengera uburenganzira bwa muntu ruza kumugira umwere.

Mu myanzuro yarwo, Urukiko rwavuze ko uriya mugabo mu magambo yavuze nta cyo yabeshye kandi ko nta kintu na kimwe kijyanye n’urwango yigeze agarukaho ngo bibe byafatwa nko gushishikariza abantu kwanga abandi.

Jean Pierre NIZEYIMANA
UM– USEKE.RW