Urukiko rwaciye Bruce Melodie miliyoni 3

16 Werurwe 2015 nibwo hatangiye urubanza hagati ya Bruce Melodie na Richard umuyobozi wa Super Level. Iyi nzu ikaba yaramwishyuzaga miliyoni 18.000.000 frw ivuga ko ariyo yamutanzeho mu gihe bakoranaga. Ubu urubanza rwafashe icyemezo ntakuka ko Melodie azishyura miliyoni eshatu 3.000.000 frw.

Ni nyuma y’uko Bruce Melodie yari amaze gutangaza ko atagishaka gukorana n’ubuyobozi bw’iyo nzu. Biza gutuma batangira imanza zimaze hafi amezi umunani.

Kuri uyu wa kane tariki ya 12 Ugushyingo 2015 mu rukiko rukuru rw’ubucuruzi i Nyamirambo, hemejwe ko uyu muhanzi azishyura amafaranga angana n’agaciro k’ibyuma yahawe na Bralirwa bivugwa ko aribyo yinjije mu gihe yakoranaga na Super Level.

Mu kiganiro na Umuseke, Umwunganizi mu mategeko ‘Metre’ Bayisabe Iréné wari ku ruhande rwa Bruce Melodie, yatangaje ko bishimiye cyane imikirize y’urubanza rwabo.

Yagize ati “Twishimiye imikirize y’urubanza. Kuko ni urubanza rutari rworoshye uretse ko twari twizeye itegeko ko rigomba kuturenganura.

Miliyoni eshatu n’ubundi nizo twemeraga kwishyura kuva na mbere hose. Ibindi byo kuba hari indirimbo yakorewe nta bimenyetso uwo twaburanaga yerekanye by’izo ndirimbo”.

Ikirego cyari  cyashyikirijwe ubushinjacyaha, cyasabaga ko hafatiirwa amafaranga uyu muhanzi yagombaga kuzajya ahembwa mu irushanwa rya Primus Guma Guma Super Star ya Gatanu ndetse n’amafaranga ahembwa na Tigo kuko ari umwe mu bafitanye nayo amasezerano.

Joel Rutaganda

UM– USEKE.RW