Uruhare rw’Ikigo ‘Mutagatifu Andreya’ mu iterambere ry’umujyi wa Muhanga

Ikigo cya Mutagatifu Andreya (Centre Saint André) kibarizwa muri Diyoseze ya Kabgayi  mu murenge wa Nyamabuye mu karere ka Muhanga cyatangiye mu mwaka wa 2001 kigamije gushyira imbere ibikorwa by’ubucuruzi mu rwego rwo kugira ngo abahagana barusheho kwakirwa neza.

Mu kiganiro umubikira ushinzwe iyamamazabikorwa mu kigo cya Mutagatifu Andreya,  Amahirwe Consolėe  yatangarije Umuseke ko mbere y’uko iki kigo kigenerwa ibikorwa by’ubucuruzi cyabanje kuba ikigo cy’amasengesho, ariko nyuma basanga cyakorerwamo ubucuruzi bikabangikana n’amasengesho.

Soeur Amahirwe yavuze ko batangiza ibikorwa by’ubucuruzi muri Diyoseze ya Kabgayi ngo byatewe n’umubare munini w’abagana iki kigo  bikabera umutwaro munini  abahakorera kubera ko  ari inyuma  gato  ugereranyije  n’aho umujyi wa Muhanga uri.

Kubera rero iyo mpamvu  byaje kuba ngombwa ko batangiza imirimo y’ubucuruzi bagambiriye  guha serivisi nziza kandi inoze.

Iki gitekerezo cyo  kwagura  ibikorwa by’ubucuruzi  bagishyize mu bikorwa batangira kubaka  inyubako zitandukanye zirimo amacumbi  n’ibyumba  by’inama  bigezwho, bifite ibiciro bitandukanye  ugereranyije n’ubushobozi bw’abantu bakunze kugana iki kigo.

Amahirwe  akomeza  avuga ko  icyumba  kimwe  cyo kuraramo  kirimo  ibikoresho nkenerwa bya buri munsi  bakibarira 10 000 by’amafaranga y’u Rwanda,  ibindi bisigaye bigenda  bigabanuka bitewe n’amikoro  ya buri wese.

Icyumba cya make kishurwa amafaranga y’u Rwanda  5000 ku munsi  ariko  kikaba ari icyumba  gicirirtse.

Mu mpeshyi ngo ni bwo abakiliya  bahagana bakunze kuboneka cyane cyane mu  mezi, gusa ngo mu mpera z’umwaka  no mu ntangiriro zawo  bakira  abakiliya bake  ugereranyije n’ubushobozi ikigo cya Saint Andrė  gifite.

Abagana iki kigo bavuga ko isuku n’umutuzo biharangwa ngo bigaterwa  n’amahugurwa bagiye baha abakozi babo  aho bagenda babigisha buri  gihembwe uburyo bwo gufata neza abakiliya.

Soeur Amahirwe yagize ati “Iyo  utanze  serivisi nziza  ku bakugana  bagenda babwirana ugasanga nyuma y’igihe gito  ufite inyungu  zitabarika. Hari  aho ugera ukabura  umuntu  ukwakira twebwe uyu muco  wo kutakira neza abakiliya twarawurenze kandi bidufitiye akamaro kanini.”

Ikigo cya Saint Andrė  Diyoseze ya Kabgayi  cyafunguye n’irindi shami mu mujyi wa Muhanga  bise  centre Saint Andrė Lumina  kirimo isoko rinini  abantu bahahiramo  ndetse, ibyumba byo kuraramo  n’inzu abagenzi bafatiramo ifunguro.

Aha i Kabgayi honyine bahafite ibyumba by’inama 10 n’amacumbi 100 iki kigo gifite ubushobozi bwo kwakira abantu  3000  nibura buri kwezi.

Muhizi Elisėe
ububiko.umusekehost.com/Muhanga