Urugendo rwa Charly & Nina i Burayi hari icyo rwabunguye

Mu byumweru bitatu bamaze ku mugabane w’i Burayi bakora ibitaramo mu bihugu bitandukanye, Charly & Nina ngo byabasigiye byinshi mu bumenyi ku buhanzi bakora.

Kuri uyu wa kabiri tariki ya 21 Werurwe 2017 ahagana ku i saa saba z’amanywa nibwo iryo tsinda ryagarutse i Kigali. Rigarukana na Big Farious bakoranye indirimbo bise ‘Indoro’.

Uretse kuba baratonzwe n’ibihe by’i Burayi {Climat} kubera ko byari inshuro ya mbere bajyayo, nta kindi kibazo bahuriyeyo nacyo. Ahubwo bishimiye uburyo bakiriwe.

Nina wagerageje kuvugana n’itangazamakuru, yavuze ko yishimira cyane uburyo abantu bo mu bihugu bagiyemo babakiriye. Byabahaye imbaraga zo kurushaho gukora cyane no kumenya gucuruza ibyo bakora.

Ku itariki ya 04 Werurwe 2017 mu Mujyi wa Bruxelles muri Birmingham Palace niho bakoreye igitaramo cya mbere. Igitaramo cya kabiri bagikora tariki ya 11 i Paris mu Bufaransa, naho icya nyuma bagikoze tariki ya 18 Werurwe 2017 i Genève mu Busuwisi.

Kuba baragaragaye ku rutonde rw’abahanzi 10 bazitabira irushanwa rya Primus Guma Guma Super Star7 nyuma bagasezera, ngo si uko basuzuguye abaritegura cyangwa se ababatoye. Ni ikibazo cy’ingenga bihe y’ibikorwa bafite.

Muyoboke Alexis umujyanama w’iri tsinda, yabwiye Umuseke ko ibivugwa ko banze kwitabira Guma Guma kubera kuyisuzugura atari byo.

“Ibyo abantu bavuga byose ntaho bihuriye n’ukuri. Ubuse iyo twemera kujyamo abandi baratangiye ibikorwa by’iryo rushanwa ntitwajyaga kuba twasigaye? Hari ibindi bikorwa turimo gutegura kandi bizashimisha abanyarwanda”– Muyoboke.

Charly & Nina bamaze kumenyekanisha ko batazitabira iryo rushanwa rigiye kuba ku nshuro ya karindwi, basimbujwe Queen Cha urigiyemo ku nshuro ye ya mbere.

https://www.youtube.com/watch?v=8FLnYVcgDL0

Joel Rutaganda

UM– USEKE.RW

Photos@ Moise Niyonzima