Urugendo rutangiza Umuganura na FESPAD rwari urukererezabagenzi. AMAFOTO

CHIEF EDITOR
08/01/2016

Baragorora umubiri binogeye amaso

Kuva i Nyamirambo ukamanuka ukagera i Nyarugenge hagati ukamanuka Umuhima wose na Nyabugogo ukerekeza Remera kuri Stade abantu bagiye bihera ijisho ibirori by’itorero ry’u Rwanda, igororangingo ry’abasore bo mu Gatenga n’imbyino n’ingoma z’abanyeSenagal. Byari mu rugendo rwo gutangiza icyumweru cya FESPAD n’Umuganura.

Aha ni aho bahagurukiye i Nyamirambo imbere ya Club Rafiki

Insanganyamatsiko iravuga ngo “TURWUBAKIRE KU MUCO TWITEZE IMBERE”, ni ibikorwa byateguwe ku bufatanye bwa MINISPOC n’Inteko Nyarwanda y’Ururimi n’Umuco.

Bageze kuri stade Amahoro i Remera, Minisitiri Julienne Uwacu wa Siporo n’umuco yafunguye kumugaragaro iki cyumweru ari kumwe n’umunyamabanga uhoraho muri iyi Minisiteri Lt Col Patrice Rugambwa.

Aha i Remera muri Parking ya Stade kandi hari kumurikwa ibikorwa bimwe na bimwe by’ubuzima bishingiye ku muco nyarwanda. Ari naho Minisitiri yahitiye kureba ibiri kumuirikwa.

Mouché Mamadou Daffé umuyobozi w’itorero ryaturutse muri Senegal yavuze ko n’ubwo kuva iwabo uza i Kigali ari intera ndende, ngo kubera ko ari Africa ihuriye hamwe, umunaniro ntacyo uba uvuze, kuko ngo kuza mu Rwanda ni kimwe no kujya muri Senegal.

Ati “Tuzi ko twaje iwanyu, ni iwacu kuko ni muri Africa, ni indimi n’umuco, twiteze ibyiza kubera ko twakiriwe neza, twiteguye ko iserukiramuco rizagenda neza.”

Mamadou, avuga ko iri serukiramuco ari ubundi buryo bw’ibiganiro byubaka hagati y’ibihugu by’umwihariko muri Africa.

Ati “Kuri jyewe ni umuco na siporo bigira uruhare mu biganiro bituje byubaka (diplomatie silencieuse), abaturage n’amoko bahura kubera ibyiza by’iserukiramuco, nibaza ko nta bindi biganiro byubaka birenze aho.”

Mamadou ngo yatangajwe cyane n’isuku yabonye mu Rwanda, ati “Uretse amateka u Rwanda rwaciyemo, hari icyizere ko igihugu cyatangiye gushinga imizi mu buryo burambye ku mugabane wose wa Africa.”

Ikindi cyatangaje AbanyaSenegal ngo ni uburyo abantu baberetse urukundo, ati “Mbakuriye ingofero.”

Rugabahunga Remi ukorera Nyabugogo yabwiye Umuseke ko imico itandukanye yabonye mu birori yamukuruye. Ku bwe yumva ko iserukiramuco rigamije gutuma umuco nyarwanda n’uwa Africa usigasirwa ntucike.

Nyiraneza Anatalie na we twasanze Nyabugogo ati “Turabona ari byiza cyane, byanshimishije urabona harimo urubyiruko rukora utuntu dushamaje. Nashimishijwe n’uburyo bagaragiwe.”

Umwe mu ntumwa zavuye muri Kenya akaba ari umuyobozi muri Minisiteri y’Umuco na Siporo iwabo, Saima Ondumu yavuze ko yanejejwe n’imico yabonye kuko ngo umuco wa Africa wagiye wigana uw’Abazungu.

Avuga ko iserukiramuco ryagarura umuco mu rubyiruko wo kutanywa ibiyobyabwenge no kubaha abakuru, kuko ngo abato baramutse badafite umuco byatuma ibihugu bisenyuka.

Saima Ondumu wo muri Kenya ati “Mbere twabagaho abantu bakundana, nta mwanzi, Abazungu baje baradutanya, tugera aho twageze ariko ubu twarabyutse, nakunze ibyo nabonye iwanyu, uko mwateguye imurika biri ku rwego rwo hejuru.”

Yavuze ko ibyo yabonye mu Rwanda azabijyana muri Kenya kuko ngo umuco wajyana n’iterambere bigatuma igihugu cyazamuka mu iterambere mu buryo bwihuse.

Iri Serukiramuco rizakomereza mu Ntara z’u Rwanda, aho kuri uyu wa kabiri tariki 2 Kanama rikomereza i Musanze, bukeye tariki ya 3 Kanama rizabera i Kayonza n’i Rusizi, ku wa kane ribere i Nyanza ndetse ku wa gatanu hazakurikireho Umunsi Mukuru w’Umuganura, i Nyanza.

Uretse abahagarariye Senegal na Kenya, hategerejwe abo mu Misiri, n’abo mu bindi bihugu byatumiwe bashobora kwitabira iserukiramuco uko iminsi izicuma.

UmunyaSenagal arabwira umunyamakuru w'Umuseke icyo baje kwereka u Rwanda — UmunyaSenagal Mamadou Daffe ukuriye itorero ryaturutse muri Senegal arabwira umunyamakuru w’Umuseke icyo baje kwereka u Rwanda

Mu bwuzuzanye bw'imico AbanyaSenagal baragerageza kubyina umurishyo w'abakaraza b'i Rwanda — Mu bwuzuzanye bw’imico AbanyaSenagal baragerageza kubyina umurishyo w’abakaraza b’i Rwanda

Umukinnyi wa za Byendagusetsa wavuye muri Senegal

Hasi si imbusane yambaye ahubwo ni ibidasa

Mu bakaraza harimo n'abagore bakubita umurishyo badasobanya — Mu bakaraza harimo n’abagore bakubita umurishyo badasobanya

Arakubita ingoma n'ubwuzu cyane — Arakubita ingoma n’ubwuzu cyane

Bamwe mu itsinda rya mbere ryavuye muri Senegal

Baratega neza na basaza babo babagaragiye

Baratega nk'inyambo n'inseko icyeye — Baratega nk’inyambo n’inseko icyeye

Aba bahagaze mu bushorishori barakina ay'abakunzi bo bakinaga ubukwe — Aba bahagaze mu bushorishori barakina ay’abakunzi bo bakinaga ubukwe

Bagaragiwe n'abakorobate bo mu Gatenga — Bagaragiwe n’abakorobate bo mu Gatenga

Abasore nabo barinaga hasi hejuru abantu bakishima

Aba bageni niko nabo bakimbagiraga cyane

Aba nabo baragenda bakubita tambour z'iwabo baririmba cyane — Aba nabo baragenda bakubita tambour z’iwabo baririmba cyane

Abo mu Gatenga kwa Carlos nabo baragenda bakora utuntu dushimishije badahagaze

Barijugunya mu kirere bagorora ingingo abantu ku muhanda bakishima cyane — Barijugunya mu kirere bakikaraga bagorora ingingo abantu ku muhanda bakishima cyane

Umwe arabafata bose agashyira mu kirere bikanogera ijisho

Muyango aragenda muri uru rugendo anezerewe cyane abyinana n'Inganzo Ngari — Muyango aragenda muri uru rugendo anezerewe cyane abyinana n’Inganzo Ngari

Muyango aragenda imbere y'iri torero — Muyango aragenda imbere y’iri torero

Aha bageze mu ikorosi ryo kwa Nyiranuma i Nyamirambo

Abakaraza bageze kuri ONATRACOM bahagaze barongera bashyiraho umurishyo

Bageze camp Kigali uducurama tuhatuye twumvise ibyabaye tuva mu buryamo bwatwo natwo dukora akarasisi

Nibo Rwanda rw'ejo niko bakwiye kurwubaka — Nibo Rwanda rw’ejo niko bakwiye kurwubaka

Bageze i Kigali abubatsi barekuye imyiko n'ibipande — Bageze i Kigali abubatsi barekuye imyiko n’ibipande

baza kureba iri serukiramuco ribaciye munsi

Aha baciye ni ahahagarara imodoka hagati mu mujyi wa Kigali

Abari hejuru mu magorofa bigiye hino ngo bihere ijisho

Bavuye mu mujyi bamunuka Umuhima w'impyisi wose abantu ari uruvunganzoka — Bavuye mu mujyi bamunuka Umuhima w’impyisi wose abantu ari uruvunganzoka

AbanyaSenagal bakiririmba bananyuzamo bakabyina

Abo mu Gatenga nabo bakijugunya mu bicu ndetse abageni bagitambagira nubwo banyuzagamo bakaruhuka

Aho bita ku Mashyirahamwe bafunze imiryango baza kureba

Uyu mugabo bamusanze Nyabugogo maze nawe si ukubereka icyo ashoboye yivayo abantu bararyoherwa cyane ku muhanda

Yatwaye igare rye araribyinishaaaa abantu baraseka cyane

Igare ry'umutende umwe umusore araritwarira mu kirere hejuru — Igare ry’umutende umwe umusore araritwarira mu kirere hejuru

Buri wese yifuzaga kugumana ibi byiza uko abishoboye

Bageze i Remera Minisitiri Julienne Uwacu na Lt Col Rutagambwa bafunguye kumugaragaro iki cyumweru cy'iserukiramuco — Bageze i Remera Minisitiri Julienne Uwacu na Lt Col Rutagambwa bafunguye kumugaragaro iki cyumweru cy’iserukiramuco

Minisitiri baramwereka ibyo baje kumurika muri iri serukiramuco

Aha hateguriwe Mini Expo y'ibigendanye n'umuco ubugeni n'umuganura — Aha hateguriwe Mini Expo y’ibigendanye n’umuco ubugeni n’umuganura

Abanyabugeni baramurika ibikorwa n'ubwenge n'amaboko byabo — Abanyabugeni baramurika ibikorwa n’ubwenge n’amaboko byabo

Aba baramurika ibitoki byiza byiza bejeje

Aba kandi barerekana imyumbati yashoye cyane ikera minini

Barerekana amoko anyuranye y'ibishyimbo bejeje kuri uyu muganura — Barerekana amoko anyuranye y’ibishyimbo bejeje kuri uyu muganura

Aha nabo bejeje ibirayi binyuranye baje kumurika amoko yabyo

Abavumvu bitwa RedRocks b'i Musanze bamuritse ubuki n'ibinyagu byabwo babuvanamo — Abavumvu bitwa RedRocks b’i Musanze bamuritse ubuki n’ibinyagu byabwo babuvanamo

Uyu musore arasogongera umutsama avuga ko uryoshye cyane

Umubyeyi arasya amasaka yeze ngo bashigishe ikivuge benge amarwa baganure

Ange eric HATANGIMANA
UM– USEKE.RW

16 Comments

Gogo says:
08/01/2016 at 20:02

Ohhhh mbega byiza weeeeeeee

Desire says:
08/01/2016 at 20:28

Wow ndabona byari sawa rwose!
Bagere no mu Ntara iwacu turebe

Akotsi says:
08/01/2016 at 21:24

Bamwe barakubitira abana kuryama, Nzaramba irenda kubanogonora, abandi bibereye mu munyenga ngo bari mu muganura. Ahaaaaa! nzaba ndeba ni umwana w’umunyarwanda.
- bosco says:
  08/01/2016 at 22:07
  
  byanze bikunze igihugu kigomba kubaho kandi niba hari ikintu kibi nukwiheba ukunva ko ubuzima buhagaze , ndetse nkuko ubivuze hari uduce tumwe twurwanda turimo amapfa nibyo birababaje ariko ntiwirengagize ko hari utundi duce twigihugu abaturage bahangayikishijwe no kubona amasoko yimyaka yabo bejeje, bishatse kuvugango ibibazo biberaho gushakirwa ibisubizo niko bigenda nawe niba uri umusore cg uri umugabo uzahura nibibazo murugo rwawe kandi uzabishakira ibisubizo ubibone. ntabwo rero iki kibazo cyinzara cyahagarika ubuzima bwigihugu ndetse biri kure yabyo kuko nizera ko reta iri kugishakira igisubizo muburyo bunoze
  - Niyoyita says:
    08/02/2016 at 00:19
    
    Aho ni he bahangayikishijwe no kubona isoko ry’ibyo bejeje ra? Nahita nsuhukirayo!
  - Mimi says:
    08/02/2016 at 09:26
    
    @Bosco we, aha urabeshye rwose nta hantu mu Rwanda tuzi ubu bahangayikishijwe no kuba barejeje byinshi bakaba barabuze isoko. Ese ubwo ushobora kuduha urugero rufatika, ukareka kwiyandikira gusa ibyo ushatse????!!!
    - muremyi says:
      08/02/2016 at 13:14
      
      njya muri burera niho na rba iri gukorera muri iki cyumweru abanyaburera bakubwire

Rwakajumba rwamuteja says:
08/01/2016 at 21:48

Byerekana ko abavuga NGO mu Rwanda #Mufite #Inzara ari ukubabeshyere…
System is hell of hell
#igitugu

bosco says:
08/01/2016 at 22:09

byanze bikunze igihugu kigomba kubaho kandi niba hari ikintu kibi nukwiheba ukunva ko ubuzima buhagaze , ndetse nkuko ubivuze hari uduce tumwe twurwanda turimo amapfa nibyo birababaje ariko ntiwirengagize ko hari utundi duce twigihugu abaturage bahangayikishijwe no kubona amasoko yimyaka yabo bejeje, bishatse kuvugango ibibazo biberaho gushakirwa ibisubizo niko bigenda nawe niba uri umusore cg uri umugabo uzahura nibibazo murugo rwawe kandi uzabishakira ibisubizo ubibone. ntabwo rero iki kibazo cyinzara cyahagarika ubuzima bwigihugu ndetse biri kure yabyo kuko nizera ko reta iri kugishakira igisubizo muburyo bunoze

JJM says:
08/01/2016 at 22:16

Aya mashusho arashimishije kbs. Nanjye reka nijugunye hejuru ngire nti ” Inzara izanyura heheee…” Ahwiiii

ngabo says:
08/02/2016 at 00:01

@akotsi we vana itiku aho,bene nkamwe ntimujya mwishima mu buzima,iteka mushakisha ibibi,yewe urababaje pe
- Akotsi says:
  08/02/2016 at 10:17
  
  Oya ahubwo ni wowe ubabaje. Kuko namwe ntimukunda ukuri, mwanga abakubabwiza. Kuvuga ko hari abo nzaramba igiye kunogonora se hari nka nciye amabere.Hari aho mbeshye se? Ese muzumva ryari ko gupfukirana ibibazo atari ko kubikemura? Ubwo se muri Kigali ni nde uyobewe ko ibiciro by’ibirirwa ku isoko byikubye 2. None se uwo muganura urumva usobanuye iki mu by’ukuri niba ubuzima burushaho kumera nabi. Urumva icyo umuntu yakwishimira ari iki?
  Kuri wowe ibyiza ni ugushinyiriza mpaka umuntu apfuye ariko isura nziza ya baringa igakomeza kugaragazwa.
  Ako ntabwo ariko ko GACIRO duhora twigishwa. Agaciro nyako ni ukugaragaza ibibazo uko biri no kubishakira ibisubizo, AGACIRO kabereye umunyarwanda gatandukanye cyane n’iyo myumvire yawe icuramye.
  - Kanyarwanda Ezira says:
    08/02/2016 at 11:55
    
    @Akotsi nari nsomye nabi izina ryawe ngira ngo ni “Inkotsa”! Mbanje kukwiseguraho.
    Birashoboka ko koko hari abagezweho n’amapfa ubu bakaba badafite ibyo gufungura. Ariko icyo ntatoyemo n’aho uhuriza iyo Nzaramba n’umuganura. Ubundi iyo uza kuba uzi umuco nyarwanda utabangukirwa kuvuga udashunguye najyaga kuguha isomo ku nzira zitandukanye n’icyo zabaha zisobanuye. habaga Inzira y’umuganura, inzira ya Gicurasi, inzira ya Kivu, inzira ya Rukungugu, ……..
    ariko kubera wahisemo kuba mubarwanya ibintu byose n’iyo nta n’igihari cyo kurwanya ndabona bigoye kugira icyo ngufasha. Gusa gerageza kugira ibitekerezo byubaka aho kubaho wiganyira, wijujuta kandi ntacyo bikungura nta n’icyo byungura abo uvuga ko bagiye kunogorwa na nzaramba. Nyamara iyo uza kuba utareba ibirorirori wari kuba uzi ko leta yabagejejho gahunda yo kugora bagahembwa ibiribwa.
    
    Va ibuzimu dore umuntu.
    - Akotsi says:
      08/02/2016 at 13:02
      
      Wowe Ezira,
      Wivuga amapfa vuga INZARA NZARAMBA kuko byose ni kimwe ntacyo bihindura.
      - keza says:
        08/02/2016 at 16:30
        
        ndashaka nanjye kugusubiza Akotsi we!!! ninde wahakanye ko ntanzara ihari kayonza ko nikimenyimenyi harinkunga bahaye uburasirazuba !! tugume turirimbe nzaramba se ubuzima buhagarare!!!hhh ubuse mu Rda byaracitse ntiturya abantu bose barasuhutse amakwe ahora aba abantu bashonje!! kuba muvugango ibiciro byarazamutse nihe bitazamutse iyi mihindagurikire yikirere nihe itageze!!ese haruwakubwiyeko inzara yazanywe no kudakora!!! va murayo suko barwanya iterambere ntaho inzara itaba icyo nemeza nuko aribihe bibi twagize kdi twizeyeko bidusigiye isomo!!niko nzaramba iruta inzara yo mubugesera yafashe na bicumbi muri 2000 ntiyarangiye se ubuzima bugakomeza!! ntabyacitse ihari ntabuzima bwahagaze reka guca ibikuba !!!

Abdallah Mohamed Al Battashi says:
11/10/2016 at 12:28

njewe mfatanyije na commentator za Bosco nta igihugu na kimwe kifite 100% ibyiza ariko iyo program iranshimishije cyane ahubwo njee mbibonamo lesson (icyigisho)abandi babonereho nkuko Bocso yavuze no murugo rwawe ntabwo bimeze neza nkuko ubishaka ariko ntiwafumbata amaboko ngo ubyihorere ahubwo ukomeza goshakisha kugirango u resourdre (solve) iyo problems

Comments are closed.

Share this:

16 Comments