Umuvunyi yahuje Abikorera n’Abakorera Leta ngo baganire kuri Ruswa ivugwa hagati yabo

• Ruswa nini ngo ni itangwa n’abikorera ikakirwa n’abakozi mu nzego za Leta.

Mu nama yabereye i Kigali kuri uyu wa kabiri ihuza inzego za Leta n’izabikorera igamije guhuza imbaraga mu kurwanya ruswa, Umuvunyi Mukuru yavuze ko hari ba rwiyemezamirimo batinya kujya gupiganwa kandi babishoboye ariko ngo ntibirirwe bajyamo kuko bemenye ko hari abo bahanganye batanze ruswa. Umuvunyi avuga ko nubwo ruswa atari nyinshi mu Rwanda uko ingana kose buri wese akwiye kuyirwanya.

Ni inama igamije ubufatanya bw’abikorera n’inzego za Leta mu kurwanya ruswa, kuko ngo byagaragaye ko ruswa nini ihabwa abakozi bo mu nzego za Leta bayihawe n’abo mu rwego rw’abikorera kugira ngo babahe serivisi runaka cyangwa babafashe gutsindira isoko runaka.

Aloysie Cyanzayire, Umuvunyi mukuru w’u Rwanda avuga ko urwego ayoboye rwifuza ko habaho ibiganiro byimbitse hagati y’izi mpande zombi kugira ngo bafate ingamba zo kurwanya ruswa.

Iyi nama yarimo abahagarariye abikorera, abanyamategeko ba Leta, abo ku rwego rw’Umuvunyi, abahagarariye ibigo bya Leta, za Minisiteri, Ikigo gishinzwe ubugenzuzi n’abandi bose hamwe bageraga nko kuri 80.

Umuvunyi mukuru ati “Ruswa ntabwo wayirwanya abo bireba bose badahuje imbaraga. Tuziko ruswa nini ari itangwa n’amasosiyete y’abikorera cyane cyane binyuze mu masoko ya Leta, mu misoro, mu nkiko ndetse n’ahandi.”

Umuvunyi yibukije ko usibye ruswa ituma ibyagateje imbere abatuye igihugu benshi byikubirwa n’abantu bacye.

Usibye ibi kandi Umuvunyi yibukije ko ruswa ari n’igihombo ku wayitanze kuko inyungu yakabonye kubera umurimo we ayiganaba n’utayikoreye. Bityo ngo cyane cyane abikorera bakwiye guhaguruka bakihagararaho bakanga gutanga ruswa.

Yavuze ko akenshi abikorera ibyabo bitezwa cyamunara cyangwa bagahagarikwa kuzongera gupiganirwa amasoko kuko baba bananiwe kwishyura inguzanyo bahawe n’amabanki ndetse ngo bananiwe kuzuza amasezerano y’imirimo bemeye gukora kuko inyungu baba babonye baba bayigabanye n’abandi batayikoreye babaha ruswa.

Ati “Utanga ruswa wibwira ko uri gushakamo inyungu ariko mu byukuri urimo wikururira igihombo.”

Abikorera bari aha bagaragaje ko mu mitangire y’amasoko ya Leta ari hamwe mu hagaragara ruswa cyane, ibi ngo bituma aya masoko kenshi ahabwa abadashoboye kuyakora kuko batanze ruswa, cyangwa abashoboye ntibirirwe bajya gupigana mu gihe bumvise ko hari abatanze ruswa.

Manzi Antoine ushinzwe abanyamuryango mu rugaga rw’abikorera (PSF) yavuze ko inama nk’iyi ari ingirakamaro mu gushakakira umuti urambye ikibazo cya ruswa kuko ngo izi ngego zombi (Abikorera n’abakorera Leta) ari ho ruswa ivugwa cyane bamwe bayitanga abandi bakira.

Urwego rw’Umuvunyi rushingiye kuri raporo zo mu gihugu na raporo z’imiryango mpuzamahanga z’imyaka ishize ruvuga ko ikigero cya ruswa mu Rwanda kiri hasi ugereranyije n’ahandi mu karere.

Aloysie Cyanzayire ati “Ariko ibyo ntibivanyeho ko tugomba gukomeza gukora igishoboka cyose tukarwanya ruswa uko yaba ingana kose.”

Raporo y’umuryango Transparency International ya 2014 ivuga ko muri rusange igihombo kingana na triyoni 2 z’amadorali y’amerika buri mwaka ku isi hose gituruka ku kutubahiriza amahame agenga amasoko ya Leta kubera ruswa. Kuri uyu wa gatatu tariki 28 Mutarama Transparency International kandi ikazamurika icyegeranyo cy’uko ruswa ihagaze mu bihugu ku isi….

Callixte NDUWAYO
UM– USEKE.RW