Umutoza mushya wa Etincelles yasabwe kuyiha umwanya wa 6

Rubavu – Uwo ni Bizumuremyi Rajab wahawe amasezerano y’umwaka umwe mu ikipe ya Etincelles kuri uyu wa 15 Nyakanga 2014 nk’uko umunyamabanga mukuru w’iyi kipe witwa Amani yabibwiye Umuseke.

Rajab ntiyatumwe igikombe, yahawe akazi ko guha ikipe ya Etincelles nibura umwanya wa gatandatu muri shampionat itaha.

Ikipe ya Etincelles imaze imyaka itatu ya Shampionat buri gihe iza mu myanya ya nyuma ndetse rimwe na rimwe hafi yo kumanuka mu kiciro cya kabiri. Shampionat ishize yayirangije ku mwanya wa 10 mu makipe 14, itsinze imikino ine gusa mu mikino 26.

Etincelles ni imwe mu makipe makuru mu gihugu yahoranye abafana benshi i Rubavu ariko ubu bivugwa ko bagabanutse cyane.

Rajabu Bizumuremyi asimbuye umutoza Bizimana Abdu bakunze kwita Beken wagiye mu ikipe y’Amagaju FC i Nyamagabe.

Rajab si mushya muri Etincelles cyangwa i Rubavu kuko mu 2012 yatozaga iyi kipe yambara umweru n’umutuku, akaba yari yahaje avuye muri Marines nayo y’aho i Rubavu.

J.Paul NKURUNZIZA
ububiko.umusekehost.com