Umuseke Player of the Month: Gutora birakomeje, bizasoza ku cyumweru

Gutora umukinnyi w’ukwezi k’Ukwakira muri shampionat y’umupira w’amaguru mu Rwanda birakomeje. Bizarangira ku cyumweru maze Umuseke itangaze uyu mukinnyi anagenerwe igihembo. Gutora ni rimwe ku munsi, bizarangira ku cyumweru saa sita z’ijoro.

Iki ni igitekerezo n’umushinga w’UM– USEKE IT Ltd, ugamije guteza imbere umupira w’amaguru muri rusange, kumenyakanisha umupira w’u Rwanda kurushoho no guteza imbere impano z’abakinnyi bakina muri shampionat y’u Rwanda itegurwa na  FERWAFA, igaterwa inkunga na AZAM TV (AZAM Rwanda Premier League).

Umuseke ufatanyije n’abandi banyamakuru b’imikino bakurukirana shampiyona y’u Rwanda buri munsi, watoranyije abakinnyi bane bahize abandi mu kwezi k’Ukwakira, ugendeye ku mpamvu zitandukanye zagaragaye mu nkuru yasohotse tariki 31 Ukwakira 2016.

Abakinnyi bane bari gutoranywamo uwitwaye neza kurusha abandi ni; Orotomal Alex, umunya-Nigeria ukinira Sunrise FC, Nahimana Shasir, umurundi wa Rayon sports, Hakizimana Muhadjiri umukinnyi mushya APR FC yakuye muri Mukura VS, na myugariro wa Gicumbi, Rutayisire Egide bita Cayi.

Umukunzi w’umupira w’amaguru, ukurikirana shampiyona y’u Rwanda, ushaka gutora umwe muri aba, abikora rimwe ku munsi anyuze ku Umuseke.rw ahari ‘Polling gadget’ yanditseho Poll&Survey.

Gutora bizarangira ku cyumweru tariki 6 Ugushyingo 2016 saa sita z’ijoro, uyu mukinnyi wa mbere uzahabwa iki gihembo azatangazwa kuwa gatatu 9 Ugushyingo 2016.

Aba bakinnyi bane barakomeza gufasha amakipe yabo mu mpera z’iki cyumweru.

Kuwa gatanu tariki 4 Ugushyingo 2016
Stade Kicukiro. 15:30: Police vs Gicumbi FC (ya Rutayisire Egide)

Kuwa gatandatu tariki 5 Ugushyingo 2016
Stade Umuganda, 15:30: Marines Fc vs Rayon Sports (ya Nahimaan Shasir)
Nyakinama, 15:30: Musanze Fc vs APR FC (ya Muhadjiri Hakizimana) 

Ku cyumweru tariki 6 Ugushyingo 2016
Ruyenzi, 15:30: Pepiniere FC vs Sunrise FC (ya Orotomal Alex)

Roben NGABO
UM– USEKE.RW