Umurambo wa Gen Aronda Nyakairima wageze i Kampala

Umurambo wa General Aronda Nyakairima kuri uyu wa gatatu nyuma ya saa sita nibwo wagejejwe i Kampala uvuye i Dubai muri United Arab Emirates (UAE). Aronda yitabye Imana kuwa gatandatu ari mu ndege avuye mu ruzinduko rw’akazi muri Korea y’Epfo.

Uyu mugabo wahoze ari umugaba w’ingabo za Uganda (2003-2013) akaba yari asigaye ari Minisitiri w’ibibera imbere mu gihugu, yitabye Imana bitunguranye ku myaka 56.

Abo mu muryango we ba hafi ndetse n’abakuru mu  ngabo za Uganda nka Gen Elly Tumwine, Gen Ivan Koreta n’abandi baje kwakira umurambo wa Gen Aronda nk’uko bitangazwa na The Monitor.

Umurambo we urakirwa mu muhango wa gisirikare uhabwe icyubahiro n’ab’ipeti rya General.

Kuri uyu wa kane uyu murambo uzajyanwa mu ngoro y’Inteko Ishinga amategeko ya Uganda gusezerwaho n’abagize Inteko nawe yari mugenzi wabo uhagarariye ingabo.

Kuwa mbere ubwo Perezida Museveni yitabiraga ikiriyo ku rugo rwa nyakwigendera, yavuze ko inkuru y’urupfu rwa Aronda yamugezeho ari mu Buhinde.

Ati “Nahise ntekereza ko ari impanuka yamuhitanye kuko nta kibazo cy’uburwayi nzi yagiraga. Ubwo twavaga mu ishyamba benshi bishwe na SIDA ariko Aronda yararokotse kuko yagiraga discipline.”

Museveni yavuze ko ubu Leta ihugiye mu kumenya impamvu y’urupfu rwe, ariko ati “Ibyo ariko ntibizamugarura. Birababaje.”

Akanama kashyizweho gutegura ibyo kumuherekeza kakaba kataratangaza igihe uyu musirikare mukuru mu ngabo za Uganda azashyingurirwa.

UM– USEKE.RW