Umunsi mpuzamahanga w’impunzi usanze ku Rwanda byifashe bite?

Kuri uyu wa Gatanu tariki ya 20 Kamena 2014 ni umunsi mpuzamahanga w’impunzi kuva hajyaho icyemezo cyo gukuraho ubuhunzi hamaze gutaha abanyarwanda basaga ibihumbi bitanu naho abagera ku bihumbi 70 baracyari i mahanga, abanyekongo bagera ku bihumbi 73 bari bari mu Rwanda nk’impunzi. Kuri uyu wa 19 Kamena Minisitiri Mukantabana yabwiye abanyamakuru uko ibibazo by’impunzi bihagaze ubu.

Nk’uko Minisitiri wo gucyura impunzi no gukumira ibiza Mukantabana Serafina abisobanura, mu bikorwa by’ibanze Ministeri ibishinzwe yakoze harimo gutuza abanyarwanda birukanywe muri Tanzaniya, gufasha impunzi z’abanyecongo zahungiye mu Rwanda kubaho neza nk’abandi benegihugu  ndetse no gukangurira iziri mu mahanga gutaha.

Ministre Mukantabana yavuze ko mu nkambi eshanu z’impunzi z’abanyamahanga (Gihembe,Kiziba,Nyabiheke,Kigeme na Mugombwa) hakozwe ibikorwa byo gusimbuza amahema amabati, kubaha uburezi bw’imyaka 12 ndetse hari gukorwa gahunda zisumbuyeho zo  kubaha ubuvuzi n’umutekano.

Kuva ubuhunzi ku banyarwanda bwakurwaho hatashye 5 000

Kuva tariki 30 Kamena 2013 ubwo ubuhunzi ku banyarwanda bari mu mahanga bwavanwagaho kugeza ubu hamaze gutaha abagera ku bihumbi bitanu, gusa ngo haracyari benshi bakiri mu mahanga nk’impunzi.

Mukantabana ati “ Gutaha ku mpunzi ni ubushake kandi umuntu ntitumushyiraho agahato kuko aba afite amahitamo, ashobora kuba afite impamvu ziruta izagaragajwe muri icyo cyemezo  gikuraho ubuhunzi akemererwa umuturage w’icyo gihugu cyangwa agasaba gutuzwa mu kindi gihugu.”

Izindi mpamvu zituma abantu badataha harimo bake baba batifuza gutaha mu Rwanda kubera kuba barasize bahekuye u Rwanda abo ngo bakora ibishoboka ayo matwara bakayacengeza no mu bandi.

Nta nahamwe impunzi ihabwa ibiribwa bihagije

MIDIMAR ifatanyije na HCR yatangije igikorwa cyo gutanga amafaranga agasimbura ibiryo birimo impungure n’ibishyimbo byahabwaga impunzi. Gahunda impunzi zimwe zatangaje ko nta kintu ibafasha kuko amafaranga bahabwa ari macye cyane.

Muri iyi gahunda buri mpunzi ihabwa amafaranga 200Rwf ku munsi.

Ministri Mukantabana avuga ko iki ari ikibazo ariko nta bushobozi bagifiteho kuko ngo biri ahari impunzi hose aho ngo usanga nta na hamwe impunzi ijya ifata ibiribwa bihagije.

Kuki  ikibazo cy’impunzi z’Abanyekongo  kitarangira?

Kuva mu 1995 kugeza uyu munsi impunzi z’abanyekongo, biganjemo abavuga ikinyarwanda, zisaga  ibihumbi 73 ziba mu Rwanda mu nkambi zitandukanye. Benshi bibaza impamvu kitarangira.

Minisitiri Mukantabana avuga ko abenshi muri  izi mpunzi bafite ikibazo gikomeye cy’imitwe yitwaje intwaro, irimo na FDLR, yabamenesheje mu byabo mu burasirazuba bwa Congo ndetse ikanica benshi muri bo.

Mukantabana avuga ko mu gihe ikibazo cy’iyo mitwe na FDLR kitarakemuka izi mpunzi zigifite uburenganzira bwo kuba mu Rwanda aho zitekanye. Nazo ngo zikaba zitagomba gusubira iwabo mu buryo butazwi.

Abahoze ari abarwanyi ba M23 aba ngo ntabwo ari impunzi zemewe kuko batarabona icyemezo cy’ubuhunzi giteganywa n’amasezerano ya Geneva kuko hatarabaho igihe cyo kubasubiza mu buzima busanzwe butari ubwa gisirikari bakabona kuzahitamo icyo bakora.

Minisitiri w’impunzi yasobanuye ko imiryango mpuzamahanga yatereranye u Rwanda ku kibazo cya M23 kuko amezi atandatu yo kubashyira mu buzima busanzwe yarangiye ariko hakaba nta kirakorwa ngo humvwe amahitamo yabo.

Uyu munsi wagenewe impunzi uzizihirizwa mu karere ka Gisagara mu nkambi y’impunzi z’abanyecongo iri i Mugombwa.

BIRORI Eric
ububiko.umusekehost.com