Umuhanda mushya wa Masaka – Kabuga (6Km) watashywe kumugararo

Ni umuhanda wubatse mu buryo bugezweho ureshya na 6Km wubatswe ku nkunga y’Ubushinwa. Uyu muhanda uri gufasha abaturage batuye umuzosi Masaka n’inkengero zayo by’umwihariko abagana ibitaro bishya bya Masaka. Uyu muhanda watashywe ku mugaragaro kuri uyu wa kabiri wuzuye utwaye miliyari 12 z’amanyarwanda.

Shen Yongxiang Ambasaderi w’Ubushinwa mu Rwanda wari waje gufungura uyu muhanda kumugaragaro yavuze ko igihugu cye inkunga kigenera u Rwanda izakomeza, kuko ubu bagiye gufasha mu kwagura ibitaro bya Masaka bikaba ibitaro byo ku rwego rw’igihugu.

Ati “Tugiye kandi gutera inkunga umushinga wo kubaka ishuri ry’ubuvuzi hafi y’ibi bitaro.”

Shen Yongxiang yavuze ko bishimira kubona inkunga baha u Rwanda ikoreshwa neza kandi ikagira uruhare rukomeye mu guhindura ubuzima bw’abaturage.

Abatuye i Masaka mu myaka mike ishize binubiraga cyane iyangirika ry’uyu muhanda, ivumbi cyangwa icyondo biteye ubwoba byahahoraga.

Mugiraneza Jean Bosco umwe mu batuye i Masaka, yabwiye Umuseke ko uyu muhanda ari igikorwa remezo gikomeye cyane kuri bo cyabagezeho.

Ati “Mbere uyu muhanda wari mubi cyane, ariko ubu nawe urareba…ababyeyi bajya kwa muganga ntibakigenda bicundugutura ku magare cyangwa za moto. Ni ibintu byo kwishimira cyane. Igisigaye ni uko hariya bagiye kongerera ibitaro abahatuye babishyura kuko bamaze kubabarira.”

Fidel Ndayisaba umuyobozi w’Umujyi wa Kigali yasabye abakoresha uyu muhanda kuwufata neza no kubahiriza amategeko agena ikoreshwa ryawo birinda impanuka.

Ndayisaba yavuze ko uyu muhanda ari umusanzu ukomeye muri gahunda yaguye y’Umujyi wa Kigali yo gutunganya imihanda ireshya na 104Km ahatandukanye muri Kigali.

Uyu muhanda wuzuye, wubatswe mu gihe cy’amezi 14.

Callixte NDUWAYO
UM– USEKE.RW