Umugabane w’Ikigega ‘Iterambere Fund’ ugeze ku mafrw 107.05

Kuri uyu wa 06 Nyakanga, umugabane w’Ikigega cy’ishoramari ‘Iterambere Fund’ cy’Ikigo mpuzamigabane y’ishoramari “Rwanda National Investment Trust (RNIT) wageze ku mafaranga 107.05 Frw.

Uyu mugabane wageze ku mafaranga 107.05 Frw, uvuye ku mafaranga 107.03 Frw wariho kuri uyu wa gatatu, bivuze ko wazamutseho amafaranga y’u Rwanda +0.02 ugereranyije n’igiciro wariho ejo hashize.

Kuva mu mpera z’umwaka ushize wa 2016, agaciro k’umugabane w’ikigega ‘Iterambere Fund’ kamaze kuzamukaho amafaranga 7.05; Bivuze ko nk’uwaguze imigabane 1 000 ku mafaranga 100 000, ubu imigabane ye imaze kugira agaciro k’amafaranga 107 050, kandi hakaziyongeraho n’inyungu ku mwaka.

Ubuyobozi bwa RNIT buteganya ko ku mpera z’umwaka, inyungu kubashoye mu kigega ‘Iterambere Fund’ izaba iri ku mafaranga ari hejuru 9%.

Ubuyobozi bwa RNIT buvuga ko kugeza ubu izamuka ry’agaciro k’umugabane w’Ikigega ‘Iterambere Fund’ rishingiye ku kuba ishoramari bakoze mu mpapuro z’agaciro mvunjwafaranga (treasury Bond) riri kubyara inyungu.

Ubu ikigega ‘Iterambere Fund’ gifite ishoramari ry’amafaranga y’u Rwanda arengaho gato miliyari imwe.

Ikigega cy’ishoramari ‘Iterambere Fund’ kandi kikaba gikomeje gukusanya imisanzu y’abantu banyuranye bifuza kugishoramo imari.Bakira amafaranga guhera ku bihumbi bibiri (2 000 Frw) kuzamura, ushira kuri Konti yabo mu mabanki atandukanye.

Vénuste KAMANZI
UM– USEKE.RW