Ubushinwa: Umugabo akijijwe no gusa na Perezida wa Koreya ya Ruguru

Mu gihugu cy’Ubushinwa hari umucuruzi w’inyama zokeje ukunzwe n’abakiriya be kubera gusa na Perezida Kim Jong Un wa Koreya ya Ruguru.

Uyu mugabo yatangiye kumenyekana nyuma y’uko umwe mu bakiliya be amusabye ko bakwifotozanya maze aramwemerera. Uyu mukiliya yasohoye iyo foto mu kinyamakuru cyo mu gace akoreramo maze abantu batangazwa n’ukuntu aba bagabo basa neza neza kandi umwe ari Umushinwa undi akaba Umunyakoreya ya Ruguru.

Manchu Tuan avuga ko we atari asanzwe yiyiziho gusa n’umuyobozi wa Koreya ya Ruguru.

Yagize ati “Umukiliya yaraje ansaba ko twakwifotozanya kuko nsa na Kim Jong Un akabona kugura burusheti ebyiri ni uko ndabyemera.”

Uyu mugabo amaze nawe kubona ko asa n’uriya muyobozi yahisemo gukoresha isura ye yamamaza ibicuruzwa bye. Ubu yashatse undi muntu umwokereza inyama kuko atakibona umwanya kubera abakiliya benshi bifuza kwifotozanya na we.

Ubucuruzi bwe yabwimuriye imbere y’ikigo cya Kaminuza ya Shenyang iherereye mu Majyaruguru y’Uburasirazuba bw’Intara ya Liaoning mu Bushinwa kugira ngo yiyegereze urubyiruko rumukundira iriya sura.

Mu kiganiro yahaye Dailymail yagize ati “Ubu nshimishwa no kubona ukuntu imari yanjye igurwa kubera ko isura yanjye isa n’iya Perezida wa Koreya ya Ruguru. Ariko mfite ikibazo kuko iyo ntahari abakiliya banga kugura burusheti batambonye ngo twifotozanye, bigatuma mpomba.”

Abakiliya be b’Abashinwa ngo usanga babwirana bati “Muze tujye kugura Kebabs (burusheti) kwa Kim-Jong Un.”

ububiko.umusekehost.com