Ubudage: Bakoze robo zikora nk’ibimonyo

Abahanga bo mu Budage bakoze imashini ntoya bita robo zikoze nk’uko ibimonyo bikoze kandi zifite ibikenewe byose ngo zikore akazi kenshi zifatanyije nk’itsinda.

Aba bashakashatsi bo mu kigo Festo bakoze izi robo mu rwego rwo kungera umuvuduko akazi ko mu nganda gakorwamo, bityo umusaruro ukiyongera.

Hari abafite impungenge ko izi mashini zishobora kuzasimbura abantu gukora akazi ko mu nganda bityo ubushomeri bukiyongera.

Izi robo zingana n’ikiganza cy’umuntu mukuru zishobora guterura ikintu runaka bitewe n’ingano yacyo.

Buri imwe muri izi robo ishobora kwifatira umwanzuro igahitamo icyo ikora, cyangwa se igafatanya n’izindi gusohoza igikorwa runaka.

Ni ubwa mbere mu mateka abahanga babasha gukora icyuma kigana neza neza ibyaremwe.

Izi robo bazise bionic ants zifite camera mu mitwe yazo zizifasha kureba aho ziva n’aho zijya ndetse no kubona ibyo zishaka gutwara.

Buri robo ifite amaboko ayifasha gufata no gukurura ikintu runaka. Zifite kandi ibyumviro( sensors) zizifasha kumenya ibiri mu mpande zazo kandi zikorana binyuze mu buryo bwa wireless ( budakoresheje intsinga) butuma ziriya robo zibwirana icyo zikwiriye gukora n’uko ziri bugikore.

Izi robo zikozwe muri plastic yakira amashanyarazi kandi imibiri yazo ikozwe mu byo bita 3D(three dimensions) yakira kandi igakwirakwiza amashanyarazi akenewe kugira ngo zibashe gukora.

Ikinyamakuru The New Scientist cyanditse ko amaguru  n’amaboko yazo akozwe mu ibumba ryorohereye rituma zibasha kugenda zitaremerewe kandi bigasaba imbaraga nkeya.

Kugeza ubu ikigo Amazon  nicyo cyonyine cyari cyarakoze  robo 15, 000 zifasha abakiriya bakeneye gutwara ibintu bitemereye kubigeza aho bashaka.

Izi robo zikoze nk’ibimonyo zizamurikwa mu imurika gurisha rikomeye ku Isi mu Ikoranabuhanga rizaba muri Mata, bikaba biteganyijwe ko hazamurikwa kandi robo z’ibinyugunyugu n’uruvu(chameleon).

UM– USEKE.RW