u Rwanda rwahawe ikindi gihembo mpuzamahanga mu Ikoranabuhanga

Mu minsi ishize u Rwanda rwegukanye igihembo mpuzamahanga mu itunganyamakuru rigezweho hakoreshejwe amajwi n’amashusho, u Rwanda rwahawe ikindi gihembo mpuzamahanga kubera uruhare mu kwihutisha kugeza ku Banyarwanda serivisi z’ikoranabuhanga rigamije kubateza imbere.

Ibi bihembo byombi byahawe u Rwanda mu Ihuriro mpuzamahanga ry’ikoranabuhanga rigamije kugira umuryango w’abaturage bakungahajwe n’amakuru (WSIS Forum 2013) ryakiriwe n’Ishami ry’Umuryango mpuzamahanga w’ikoranabuhanga (ITU).

Iri huriro ryarabereye ku cyicaro cya ITU kiri i Geneva mu Busuwisi, aho ryigaga kuri gahunda z’iterambere za nyuma y’umwaka wa 2015.

Houlin Zhao, Umunyamabanga Mukuru wungirije w’Umuryango mpuzamahanga w’ikoranabuhanga yashimiye byimazeho u Rwanda rwerekanye ibyagezweho mu kurushaho korohereza Umuryango Nyarwanda kugerwaho n’amakuru abaganisha ku iterambere.

Yagize ati “U Rwanda rufite umugambi uhamye w’ikoranabuhanga rigezweho mu kwihutisha iterambere kandi ugenda ugerwaho, harimo n’uko ikoranabuhanga ryarushaho kwimakazwa mu gutanga umusanzu wo kunoza inzego zitandukanye mu gutera imbere.”

Igihembo cya mbere u Rwanda rwahawe na ITU, rugikesha umushinga rwatangije wo kwigisha abana b’u Rwanda by’umwihariko n’Ab’Afurika muri rusange, rubaha ubumenyi buhanitse mu itunganyamakuru rikoresha amajwi n’amashusho.

Ibyo bikaba bikorerwa mu ishuri rya Africa Digital Media Centre (ADMA) riherereye mu mujyi wa Kigali. Iri shuri rikaba ryigisha gukora amafilime mu buryo bugezweho.

Minisitiri w’Urubyiruko n’Ikoranabuhanga mu Itumanaho n’Isakazabumenyi (MYICT), Jean Philbert Nsengimana ni we wakiriye iki gihembo ku ruhande rwa Guverinoma y’u Rwanda.

Nyuma ya cyo, yongeye kwakira igihembo cyagenwe na ITU cy’uko u Rwanda rwabaye igihugu cya mbere cyatanze icyegeranyo ku ishyirwa mu bikorwa rya gahunda yo kugeza ku baturage amakuru mu buryo bugezweho abaganisha ku iterambere rirambye.

Ministre Nsengimana yagize ati “Iki gihembo cya kabiri cyahawe u Rwanda bitewe n’uko rwashyize mu bikorwa gahunda yo kugeza byihuse ku baturage amakuru abaganisha ku iterambere (implementing WSIS plan of action) bigendeye ku ngingo 11 zatanzwe kandi zubahirizwa n’ibuhugu byose bigize ITU.”

U Rwanda rushimirwa kuba ikoranabuhanga rikoreshwa mu nzego hafi zose z’ubuzima bw’igihugu.

Myict/PROffice
UM– USEKE.RW