u Rwanda na Uganda byaguye miswi

Remera – Byari ibya gicuti, ariko hagati y’u Rwanda na Uganda guhangana kuba ari kose mu kibuga. Mu gihe ku munota wa 83 abanyarwanda bari bafite ipfunwe batewe no gutsindirwa mu rugo n’abakeba muri ruhago bo mu majyaruguru, kuri uwo munota nibwo Sibomana yabavanye mu isoni astinda icya 2 cyo kunganya birangira bityo.

Wari umukino wa gicuti ku ngengabihe ya FIFA kuri uyu wa 06 Gashyantare, Amavubi niyo yatumiye Imisambi ya Uganda, ikipe ya mbere muri aka karere ku rutonde ngarukakwezi (Ukuboza 2012) rwa FIFA (Uganda kuwa 81/ u Rwanda kuwa 137)

Ku munota wa 29 umusore Saidi Kyeyune wa Uganda yari amaze kubona igitego cya mbere, abantu bari bataraba benshi kuri Stade Amahoro dore ko uyu mukino watangiye kwinjira aha macye ari 500Frw, kandi mu masaha y’akazi.

Kagere Meddy, umugande wahawe ubwenegihugu bw’u Rwanda, yishyuye ku munota wa 45 mbere yo kujya kuruhuka. Igice cya mbere kirangira nibura abafana b’Amavubi biruhukije ko kitarangiye batsinzwe.

Mu gice cya kabiri abantu bari bamaze kuba benshi, ahishyuzwaga bahagize ubuntu, ndetse n’amasaha amaze kwicuma bamwe bakikutse imirimo bariho binjira. Umukino wakomeje gukinwa n’impande zombi, buri ruhande rugaragaza ubushobozi bwarwo ntayihariye cyane kurusha indi.

Ku ikosa rya myugariro Ndaka Frederick w’Amavubi, yagushije Tony wa Uganda mu rubuga rwa Ndoli Jean Claude maze Penaliti bahaye Dan Sserunkuma ayishyiramo neza cyane.

Amavubi ya Haruna, Miggy, Kagere na Iranzi yakomeje gushakisha ubwishyu, ari nako abafana bari bumiwe bibaza uko Uganda ibatsindiye mu rugo.

Umutoza Milutin Sredojević bita Micho yashyizemo abasore nka Jessy Reindorf na Patrick Sibomana (Papy) uca ku ruhande imbere ngo batize umurindi ba Kagere Meddy imbere.

Aba basore bombi nibo baje guhindura ibintu ku munota wa 83 Reindford ahereza uyu musore ukinira Amavubi y’abatarengeje imyaka 17, atsinda igitego cyo kwishyura abafana bariruhutsa, umukino urinda urangira.

Ababanjemo Rwanda

Jean Luc Ndayishimiye

Michel Rusheshangoga

Twite Kabange Mbuyu

Fabrice Twagizimana

Frédéric Ndaka

Jean-Baptiste Mugiraneza

Harouna Niyonzima

Tumaine “Titi” Ntamuhanga

Jean-Claude Iranzi

Peter Kagabo

Meddie Kagere

Ababanjemo Uganda
Abel Dhaira

Denis Guma

Habib Kavuma

Savio Kabugo

Simeon Masaba

Hassan Mawanda Wasswa

Saidi Kyeyune

Daniel “Dan” Sserunkuma

Hamis Kiiza

Brian Umony

Mike Sserumaga

 

Imwe mu yindi mikino mpuzamahanga yabaye none:

Tanzania              1 – 0 Cameroon

Zimbabwe           2 – 1 Botswana

Kenya   3 – 0 Libya

Chile      2 – 1 Egypt

 

Plaisir MUZOGEYE
UM– USEKE.COM