Sudani zombi zafunguye imipaka izihuza, yari yarafunzwe muri 2011

Kuri uyu wa Gatatu, umukuru w’igihugu cya Sudani, Omar al-Bashir yategetse ko umupaka w’igihugu cye na Sudani y’epfo ufungurwa. Ibi bibaye ku nshuro ya mbere kuva Sudani y’Epfo yakwiyomora kuri Sudani muri 2011.

Intambara hagati ya Sudani na Sudani y’Epfo yamaze imyaka 22 itewe n’uko abaturage bagizwe n’Abirabura, ubu biganje muri Sudani y’epfo bavugaga ko bakandamizwa n’Abarabu bagaragara muri Sudani ya Bachir.

Mbere gato y’uko Perezida Bachir atanga iryo tegeko, Sudani y’epfo yari yategetse ingabo zayo zari ku mupaka uyihuza na Sudani kuhava zigasubira mu birindiro byazo.

Kugeza ubu ariko haracyari ikibazo hagati y’ibihugu byombi kerekeranye n’igifite uburenganzira kurusha ikindi ku gace ka Heglig gakungahaye ku bikomoka kuri petelori.

Muri 2012 ibihugu byombi byararwanye bipfa ako gace. Intambara hagati y’ibihugu byombi yarangiye muri 2005 ubwo Sudani y’epfo yabonaga ubwigenge.

Nubwo Sudani y’epfo yigenga, ubu ivugwamo amakimbirane hagati ya Perezida Salva Kirr n’uwahoze ari Visi Perezida we Riek Machar.

Ayo makimbirane amaze guhitana abaturage benshi abandi bavuye mu byabo baba impunzi imbere mu gihugu ndetse no muri Sudani. Ingabo zaharaniye ukwibohoza kwa Sudani y’epfo zari ziyobowe na nyakwigendera John Garang.

Jean Pierre NIZEYIMANA
UM– USEKE.RW