Stephen Constantine watozaga Amavubi yasezeye ku mirimo ye

15 Mutarama 2015 – Umwongereza watozaga Amavubi mu gihe cy’amezi umunani ashize yeguye ku mirimo ye kuri uyu wa kane akoresheje ibaruwa yanditse kuri Internet imenyesha ubwegure bwe nk’uko byemezwa na FERWAFA. Akaba ubu yari akiri mu biruhuko by’akazi iwabo.

Mu minsi ishize byavuzwe ko uyu mutoza yifuzwa cyane n’ikipe y’igihugu y’Ubuhinde. FERWAFA yatangaje nyuma gato ko uyu mutoza akiri kumwe n’Amavubi ariko ari mu biruhuko.

Constantine yeguye habura iminsi irindwi ngo u Rwanda rukine na Tanzania umukino wa gicuti.

Uyu mutoza mu kwegura kwe ntiyaciye ku ruhande kuko yemeje ko yabonye akazi gashya mu Buhinde.

Ibi byemejwe kandi n’umuvugizi wa FEWAFA Musa Hakizimana wabwiye Umuseke ko koko babonye ibaruwa y’uyu mutoza isezera ku kazi kuko yabonye akandi kazi mu Buhinde.

Stephen Constantine avuga ko akazi yagahawe kuri uyu wa kane nyuma yo gutoranywa ku rutonde rw’abandi bashoboraga kugahabwa.

Constantine niwe mutoza wari kumwe n’Amavubi akagira umwanya mwiza (68) ku rutonde ngarukakwezi rwa FIFA mu mateka y’u Rwanda.

Yamenyesheje ko imirimo mishya yahawe mu Buhinde yayemeye ari nayo mpamvu y’ubwegure bwe ku kazi yari afite mu Rwanda.

Avuga ko asezeye neza kandi yishimira ibyo yagezeho mu Rwanda ndetse akavuga ko ntawuzi icyo imbere hateganya ashobota kuzongera gukorana n’umupira w’amaguru mu Rwanda.

Musa Hakizimana yatangaje ko bagiye kureba uko bakina umukino wa gicuti na Tanzania uzabera i Mwanza tariki 22 Mutarama 2015 ibindi ngo bazabireba nyuma.

Jean Paul NKURUNZIZA
UM– USEKE.RW