Somalia: Ingabo za Kenya ziravuga ko zishe abarwanyi ba Al Shabab 52
Ingabo za Kenya zimaze igihe zihangana n’Umutwe wa al-Shabab ufatwa nk’uw’iterabwoba ukorero muri Somalia
Ubuyobozi bw’ingabo za Kenya buremeza ko kuri uyu wa Gatanu ingabo zabo zaguye gitumo abarwanyi ba al-Shabab benshi zicamo abagera kuri 52.
Umuvugizi w’ingabo za Kenya (KDF), Col. Joseph Owuoth yavuze ko uru rugamba rwabereye ahitwa Badhaadhe.
Col. Owuoth avuga ko mu nkambi ya bariya barwanyi bahasanze imbunda, amasasu n’amakarita y’intambara.
Itangazo rya Minisiteri y’ingabo rivuga ko igitero cyaguyemo bariya barwanyi cyagabwe n’ingabo zirwanira ku butaka ziherekejwe n’ibifaru n’intwaro ziremereye zarasaga aho abarwanyi baciye ingando.
Igisirikare cya Kenya gifite ingabo nyinshi ziri mu zoherejwe n’Umuryango wa Africa yunze Ubumwe (AU) guhangana na al-Shabab muri Somalia.
Umwanzuro wo kohereza ingabo muri Somalia, Kenya yawufashe nyuma y’ibitero al Shabab yagabyeyo muri 2011.
Al Shabab imaze imyaka myinshi irwanya ubutegetsi bwo muri Somalia, igendera ku matwara n’amahame akomeye y’Idini ya Islam.
Uyu mutwe uvuga ko udashaka ko Leta y’i Mogadishu igendera ku mahame n’imfashanyo z’ibihugu byo mu Burengerazuba bw’Isi.
Kugeza ubu nta muyobozi wa Al Shabab wari wagira icyo avuga ku byo ingabo za Kenya zatangaje.
Jen Pierre NIZEYIMANA
UM– USEKE.RW
English