Somalia: Ibitero bya al-Shabab kuri hoteli ebyiri byahitanye abantu 20
Umutwe w’inyeshyamba wa al-Shabab ukunze kugaba ibitero bigahitana abantu benshi muri Somalia no muri Kenya
Minisitiri w’umutekano muri Somalia yatangaje ko abantu 20 bishwe n’inyeshyamba za Kisilamu za al-Shabab mu gitero yagabwe ku mahoteli abiri ari mu murwa mukuru Mogadishu mu ijoro ryakeye.
Minisitiri Abdirisak Omar Muhamed yatangarije BBC ko muri ibyo bitero hakomerekeyemo abandi bantu 20.
Ibi bitero bibiri kimwe cyagabwe kuri Hotel yitwa Lido Sea Food no ku yindi iri ahitwa Beach View mu murwa mukuru Mogadishu.
Imodoka zari zitezemo ibisasu zaturikirijwe hafi kuri izi hoteli, hanyuma abarwanyi ba al-Shabab batangira kurasa urufaya abantu bahungaga.
Abarwanyi ba Al Shabab bahise bafata bugwate bamwe mu bari muri hoteli harimo n’abakozi mu gihe cy’amasaha ane.
Inzego z’umutekano za Somalia zatangaje ko zabashije kubirukana kandi umwe muri izo nyeshyamba yatawe muri yombi.
Minisitiri w’intebe wa Somalia Omar Abdirashid Ali Sharmarke abicishije ku rubuga rwa Twitter yamaganye ibi bitero, avuga ko biteye isoni kandi ko yifatanyije n’ababiguyemo.
Callixte NDUWAYO
UM– USEKE.RW
English