Somalia: al – Shabab yigaruriye imijyi ingabo za Kenya zavuyemo
Umutwe w’inyeshyamba wa al-Shabab ukunze kugaba ibitero bigahitana abantu benshi muri Somalia no muri Kenya
Muri Somalia abarwanyi bagendera ku mahame ya Kisilamu bo mu mutwe wa al-Shabab binjiye mu mijyi imwe barayigarurira nyuma y’amasaha make ingabo za Kenya ziyivuyemo kubera igitero ziherutse kugabwaho n’izi nyeshyamba.
BBC Swahili avuga ko imijyi yigaruriwe n’aba barwanyi irimo Al-Adde, Hosingoh na Badhaadhe.
Amakuru aravuga ko mu mujyi wa Hosingoh aba barwanyi binjiyemo ari benshi bakageza ijambo ku bahatuye ndetse banashyiraho ubahagarariye.
Ibi bibaye nyuma y’uko ingabo za Kenya zari mu z’Umuryango wa Africa zibungabunga amahoro muri Somalia zivuye mu mijyi imwe n’imwe nyuma y’uko zagabweho igitero n’abarwanyi ba al-Shabab kigahitana abatiri bake mu nkambi ya gisirikare yari mu mujyi wa Al-Adde.
Iki gitero cyabaye tariki ya 15 Mutarama umutwe wa al- Shabab wavuze ko cyaguyemo abasirikare ba Kenya bagera ku 100.
Gusa Leta ya Kenya yabyamaganiye kure, ariko yo n’ubu ntiratangaza umubare nyakuri w’ingabo zayo zaguye muri iki gitero n’izagikomerekeyemo.
Umuvugizi w’ingabo muri Kenya abajijwe ku kuva muri iyi mijyi bari bafitemo ingabo muri Somalia, yavuze ko ari ibisanzwe ko ingabo zisimburana, ngo ntabwo ari uguhunga iyo mijyi.
Bamwe mu baturage ba Kenya bafite abasirikare bari mu butumwa muri Somalia barinubura uburyo Leta idashaka kubatangariza ibijyanye n’amakuru y’abana babo.
Kuri uyu munsi Perezida wa Kenya Uhuru Kenyatta, hamwe na bagenzi be uwa Nigeria Muhammadu Buhari ndetse n’uwa Somalia Hassan Sheikh Mohamoud barajya kunamira ingabo za Kenya zaguye mu gitero cya al – Sahabab. Iki gikorwa kirabera mu mujyi wa Eldorat uherereye mu Burengerazuba bwa Kenya.
Kenya ifite abasirikare 4000 mu gihugu cya Somalia. Bari mu ngabo z’Umuryango wa Africa zishinzwe kubungabunga amahoro muri Somalia (AMISOMU).
Callixte NDUWAYO
UM– USEKE.RW
English