Social Mula na Gisa Cy’Inganzo bararebana ay’ingwe bapfa indirimbo

Aba bombi ni bamwe mu bahanzi nyarwanda bafite ubuhanga muri bo mu miririmbire y’umwimerere ‘Live’ ndetse bari mu bahanzi bakeya bashobora kuririmba ibyo biyandikiye. Kuri ubu bashyamiranye bapfa indirimbo umwe yibye undi.

Mu minsi ishize Social Mula yashyize hanze indirimbo yise ‘Umuturanyi’ yari imaze gukundwa n’abantu benshi ndetse ntiyavaga no ku maradiyo kuko wasangaga ahantu hose ariyo ikinwa.

Iyo ndirimbo hari amakuru yaje kugera kuri Gisa Cy’Inganzo ko hari abayumvishe yagiye hanze kandi ariwe wari arimo kuyikoraho nubwo yari yarabwiye Social ko yazaza bakayiririmbana.

Icyaje gutungurana ni uko uretse amajwi ya Gisa Cy’Inganzo yahanaguwe mu ndirimbo ya Social naho n’iya Gisa ni kimwe n’iya Social Mula.

Umujyanama wa Gisa Cy’Inganzo ‘Manager’ Eliel Sando, yatangarije Umuseke ko nabo bagiye gushyira hanze iyo ndirimbo ndetse anasobanura ibyayo.

Yagize ati “Iyi ndirimbo yakozwe ku gitekerezo cya Dj K muri studio yitwa Umoja record. Indirimbo twateganyaga gushyiramo n’abandi bahanzi.

Hari hamaze kuririmbamo Social na Edouce ariko twahise dutungurwa na Social ukuntu yahise ayiba akayiyitirira. Iyi ndirimbo twari twayikunze tucyungurana ibitekerezo bizima kugirango izabe nziza kurushaho . Ariko n’ubundi ibyo twayiteganyirije bizakomeza”.

Uretse ibi byatangajwe n’umujyanama wa Gisa Cy’Inganzo, Social Mula yavuze ko ibyo byo kuba yaribye indirimbo atabizi. Icyo azi ari uko indirimbo ari iye.

Umva indirimbo ya Gisa

Umva iya Social

Joel Rutaganda

UM– USEKE.RW