Sentore, Melodie na Christopher bahurijwe mu gitaramo

Bwa mbere hateguwe igitaramo kigiye guhuriramo Jules Sentore, Bruce Melodie na Christopher nka bamwe mu bahanzi usanga kenshi bakunzwe n’abantu batandukanye yaba abakera n’ab’ubu kubera zimwe mu ndirimbo zabo.

Uretse kuba baragiye bahurira mu irushanwa rya Primus Guma Guma Super Star rihuza abahanzi 10 bakunzwe mu Rwanda, nibwo bagiye guhurira ku rubyiniro ‘stage’ ari ugususurutsa abantu bitari irushanwa.

Icyo gitaramo kiswe ‘Jules Sentore in concert’, ni kimwe mu bitaramo bishobora kwitabirwa n’abantu benshi ukurikije buri muhanzi abafana afite bakunda ibihangano bye.

Ku ruhande rwa Jules Sentore wateguye icyo gitaramo, yabwiye Umuseke ko ari igitaramo cyo kumvisha abantu uburyohe bwa muzika nyarwanda atari ihangana hagati yabo.

Yagize ati “Nibwo tugiye guhurira mu gitaramo kimwe cyacu twateguye kitari irushanwa aho buri umwe aba acungana n’undi ku jisho.

Ku muntu wese ukeneye umuziki nyawo cyangwa se no kunezerwa na muzika y’umwimerere ‘live’ nta kintu mfite namubwira ubu keretse niyiyizira akaba ariwe uzagira icyo atangaza nyuma y’igitaramo”.

Jules Sentore asanzwe amenyerewe cyane mu ndirimbo gakondo avanga n’iz’ubu. Benshi mu bakurikirana umuziki bakavuga ko ashobora kuzatera ikirenge mu cya nyirarume Massamba Intore.

Bruce Melodie ni umwe mu bahanzi bamaze kubaka izina mu kuririmba by’umwimerere ‘live’. Ni nawe uherutse kwegukana umwanya wa kabiri mu irushanwa rya Primus Guma Guma Super Star ya gatanu.

Christopher ari mu bahanzi nyarwanda bafite umubare munini w’abafana baba ab’urubyiruko ndetse n’abakuze kubera ijwi rye ndetse n’indirimbo ze.

Ntundize, Ntujya unkinsha, Turaberanye, ni zimwe mu ndirimbo Bruce Melodie azaririmba muri icyo gitaramo. Christopher akazaririmba zimwe mu ndirimbo zirimo ‘Abasitari, Dutegereje iki, n’izindi.

Mu gihe Jules Sentore ateganya kuzaririmba zimwe mu ndirimbo nshya ateganya gushyira kuri album ye arimo gutegura ndetse na zimwe zimaze iminsi zikunzwe zirimo, Indashyikirwa na Kora akazi.

Icyo gitaramo giteganyijwe kuba ku itariki ya 25 Werurwe 2016 kuri Villa Portofino Kigali i Nyarutarama. Kwinjira bikazaba ari 5000 frw ku muntu umwe ndetse na 8000 frw ku bantu babiri (Couples).

https://www.youtube.com/watch?v=deDQnI9fNv0

Joel Rutaganda

UM– USEKE.RW