Senderi nyuma yo kwambara amahembe y’inka, ngo i Kigali azambara nk’umu star

Senderi International Hit umuhanzi ukomeje kurangwa n’udushya mu bitaramo by’irushanwa rya Primus Guma Guma Super Star 4, nyuma yo kwambara amahembe y’inka mu gitaramo cyabereye i Nyagatare mu Ntara y’Iburasirazuba, i Kigali ngo azambara nk’aba stars.

Mu bitaramo bigera ku 9 bya Playback byaberaga mu turere dutandukanye two mu Ntara z’u Rwanda, uyu muhanzi yazaga yambaye imyenda y’ibikorwa bihakorerwa.

International Hit ubusanzwe ni umwe mu bahanzi bazwiho urwenya rwinshi nubwo hari abamunenga ko ibyo akora imyaka ye itabimwemerera.

Gusa Senderi avuga ko ibyo akora abizi. Senderi yabwiye Umuseke ko nyuma yo kwambara amahembe y’inka i Nyagatare ubu noneho i Kigali bitegure kuzareba imyambaro ye.

Yagize ati”Abantu benshi bakunze kuvuga ko ibyo nkora bitajyanye n’imyaka yanjye. Ariko nyama ndabikora nkabona iyo miliyoni ku kwezi kandi n’abakunzi banjye bakishima, akandi kazi katari ako ni akahe?

Mu gitaramo cya Live kizaba ku itariki ya 21 Kamena 2014 kuri Petit Stade i Remera, nzambara nk’umu star kuko ndi nawe”.

Senderi International Hit avuga ko ibyo akora abikorera abakunzi ba muzika muri rusange, ndetse ko bimaze gutuma agira izina rikomeye mu bantu benshi ari nawo mugambi we wa mbere yari afite muri muzika.

Joel Rutaganda
ububiko.umusekehost.com