Sebanani Emmanuel mu gahinda nyuma yo kuvunikira muri Police FC ikamwirukana

Sebanani Emmanuel bita Crespo umukinnyi wa Police FC aratangaza ko amaze amezi atandatu atavuzwa, ikipe ye ikavuga ko ntakitarakozwe, ahubwo we ashobora kuba afite ikindi kibazo. Uyu mukinnyi akaba aherutse kwerekwa umuryango usohoka muri iyi kipe.

Sebanani wigeze guhamagarwa mu ikipe y’igihugu Amavubi nka rutahizamu watangaga ikizere ejo hazaza ubu yaravunitse, ndetse yaje gusezererwa na Police FC we akavuga ko iyi kipe yari ikwiye kuba yaramuvuje nk’umukozi wayo.

Yabwiye Umuseke ati “Navunikiye mu ikipe yanjye ya Police FC,  abaganga barankurikiranye bemeza ko ngomba kuvuzwa. Ariko ubu bandekuye (bamusezereye) gutyo gusa nk’aho batanzi.”

CIP Jean de Dieu Mayira, umuvugizi w’ikipe ya Police FC avuga ko Police FC ntacyo itamukoreye kugeza ubwo ubu atakiri umukinnyi wabo.

CIP Mayira ati “Twamucishije mu cyuma Faisal (Hopital) bamutegeka ko ajya muri Gym nayo turagenda turayishyura, sinzi n’undi muganga wo ku giti cye nawe wamuteye agashinge, ibyo byose turabyishyura, ibyo kumubaga ni ibye twe ntabyo tuzi n’abaganga ba Police ntabyo bazi kandi ntabwo akiri umukinnyi wacu rwose”

Sebanani avuga ko ubu atazi uko azabigenza ngo abashe gusubira mu kibuga. Agasaba ko Police FC yamuvuza agakira nubwo iyi kipe yo itabikozwa kuko amasezerano yari afitanye nayo ngo yarangiye.

UM– USEKE.RW