Safi na Queen Cha nibo badakora Gospel mu muryango wabo

Safi Madiba wo itsinda rya Urban Boys n’umuhanzikazi Queen Cha mu byara we, ngo nibo bonyine mu muryango wabo baririmba indirimbo zisanzwe ‘Secura’ abandi bose ni ‘Gospel’ indirimbo zihimbaza Imana.

Mu mwaka wa 2007 nibwo Safi yarangije amashuri yisumbuye ari nabwo yaje kuvumbura ko afite impano mu kuririmba.

Dore ko na mbere yaho yari umuririmbyi muri choral ariko akaba yarumvaga adashobora kuba umuririmbyi w’umwuga.

Kuri ubu ngo afata muzika nk’akazi ke ka mbere aha umwanya kuko niyo imubeshejeho bimwe mu bintu yahoraga afite cyangwa yifuza mu nzozi ze.

Mu kiganiro na Isango Star yagize ati “Burya buri muntu agira umuhamagaro we. Njye na Yvonne witwa Queen Cha nitwe gusa turirimba indirimbo zisanzwe secura mu muryango wacu.

kuko mu muryango dukomokamo twese turi abahanzi uretse ko abandi bose ari abaririmbyi b’indirimbo zihimbaza Imana gospel.

Kuba dukora secura rero, ni uko ariwo muziki udutunze kandi dufata nk’akazi ka buri munsi. Nta kintu na kimwe ukenera ngo ugisabe i wanyu nk’umuntu utagira akazi”.

Iyi mpano yo kuririmba, Safi ayikesha Nyina umubyara kuko ngo ariwe wakoze akazi katoroshye ko kumuganisha mu itorero aho yakuze aririmba bikaza kumuviramo kubigira iby’umwuga.

Iras Jalas

UM– USEKE.RW