“Rwandan Christian Convention” igiterane kigiye guhurirwamo n’Abayanyarwanda baba muri Amerika

Ku nshuro ya kabiri, Abanyarwanda batuye muri Leta Zunze Ubumwe za Amerika bazahurira mu giterane cy’iyobokamana cya “Rwandan Christian Convention”, kizabera mu Mujyi wa Dallas, ku matariki ya 5-7 Kanama 2016.

Iki giterane ngarukamwaka cy’iminsi itatu gitegurwa n’amatorero y’Abanyarwanda bo muri America bufatanyije n’ Ambassade y’u Rwanda i Washington DC.

Pasteur Manywa Jean-Bosco umuyobozi wa Rwandan Christian Convention avuga ko biteze ko iki giterane kizahuriza hamwe Abanyarwanda batuye muri Canada ndetse na Leta Zunze Ubumwe za Amerika basaga Magana atanu (500).

Akomeza avuga ko imyiteguro ya nyuma y’iki giterane irimo igenda neza kandi n’ubwitabire abona buzaba bwinshi ugereranije n’igiterane cya mbere cyabereye mu Mujyi wa Chicago ho muri Leta ya Illinois.

Pasiteri Manywa avuga ko intego nyamukuru y’iki giterane ari uguhimbaza Imana nk’Abanyarwanda bayishimira ibikomeye yabakoreye kandi bakanasengera igihugu cy’u Rwanda n’ubuyobozi bwarwo.

Bavuga ko by’ umwihariko bazasengera Abanyarwanda batuye mu mahanga kugira ngo ubumwe n’urukundo rw’Imana bikomeze biganze mu mitima yabo, kandi kugira ngo Imana ikomeze ifashe abayobozi b’u Rwanda mu rugamba rw’ iterambere igihugu cyiyemeje.

Biteganyijweko muri iki giterane hazanatangwamo ibiganiro mu matsinda ku bumwe n’ubwiyunge bishamikiye ku nsanganyamatsiko yigiterane igira iti “Unified Christians for a unified Nation”.

Bisobanuye mu kinyarwada biti “Aba kristo bashyize hamwe, bafite intego y’ubumwe bw’igihugu”, kuko abamenye kristo bagasa nawe, nibo batuma imiryango imera neza bityo n’ igihugu kikamera neza.

Aba banyarwanda bifuza ko amateka y’u Rwanda ahinduka akaba ay’uko Abanyarwanda ari ubwoko burangwa n’urukundo rw’Imana ndetse ku buryo n’amahanga yakomeza kuza kubigiraho.

Usibye abarirmbyi b’abanyarwanda batuye muri Amerika nka Adrien Uwizeye na Willy Uwizeye bazitabira iki giterane, hanitezwe abandi bahanzi bakomeye bazava mu Rwanda barimo Gabby Kamanzi, Aline Gahongayire na Aime Uwimana. Iki giterane kizitabirwa na Bishop John Rucyahana nawe uzaba uvuye mu Rwanda.

Joel Rutaganda

UM– USEKE.RW