Rwanda: Abakomoka ku bakoze Jenoside na bo bahungabanyijwe na yo

Ubwo Abashakashatsi b’Abanyarwanda bagaragazaga ubushakashatsi bwabo ku bijyanye na Jenoside yakorewe Abatutsi n’imibanire y’Abanyarwanda nyuma yayo, berekanye ko ihungabana riri ku barokotse Jenoside n’ababakomokaho ryageze no ku bakomoka ku bakoze Jenoside.

Ubu bushakashatsi bwerekanye ko abakomoka ku  bakoze Jenoside bumva bafite ipfunwe n’ikimwaro biturutse ku byo benewabo bakoze bityo ibi bikagira ingaruka mu mitekerereze yabo ndetse bamwe bagahinduza amazina cyangwa bakimuka iwabo.

Theoneste Rutayisire wiga imenyamuntu (Anthropologie) muri Kaminuza ya Amsterdam mu Buholandi yavuze ko mu gihe Gacaca yabaga hari abana bagiye kumva ubuhamya bwavungwaga n’ababyeyi babo.

Nyuma ngo ubushakashatsi yakoze bwasanze bamwe muri aba bana bafite ibibazo by’ihungabana birimo kuba bibaza icyateye ababyeyi babo kwica abandi babaziza ubusa bityo bakumva batakwitwa benewabo kuko bibatera icyasha kandi nta ruhare bagize mu  byabaye.

Kuba kandi ngo bumva ko benewaboo bafunze bazira uruhare bagize muri Jenoside yakorewe Abatutsi mu 1994 bituma bumva babakumbuye kuko basangiye amaraso ariko bakwibuka ko bagize uruhare muri Jenoside bigatuma bumva bashobewe.

Uyu muhanga yavuze ko ibyabaye mu Rwanda bitandukanye n’ibyabaye mu Burayi ubwo Abayahuudi bicwaga n’aba Nazi ba Hitler Adolphe.

Mu Budage abakomoka ku bakoze Jenoside yakorewe Abayahudi (1935-1945) bo ngo bumva bafitiye umujinya abo benewabo.

Kuba muri biriya bihugu hari abakomoka ku bahoze ari AbaNazi ariko ubu bize, bakaba baba no mu mijyi ikomeye, bituma babasha gusesengura ibyabaye bakibaza niba ari ubujiji bwabibateye cyanwgwa ari ubugome gusa, ibi bikabatera uburakari.

Dr Richard Benda wigisha muri Kaminuza ya Manchester mu Bwongereza yagarutse ku kamaro ka ‘Ndi Umunyarwanda’ nk’uko byagarutsweho na Youth Connect Forum ubwo yatangizwaga muri 2014.

Uyu mushakashatsi yavuze ko Ndi Umunyarwanda ari imwe mu ngamba zakoreshwa mu kongera umuvuduko w’ubwiyunge no guteza imbere Ubunyarwanda, ariko yongereho ko n’abana bakomoka ku bakoze Jenoside bagomba gufatwa nk’abahungabanyijwe na yo bityo komora umuryango nyarwanda bigakorwa mu buryo bukomatanyije.

Abatanze ibitekerezo ku ngingo zaganiriweho bashimye abakoze ubushakashatsi ariko basaba ko ubutaha bazanoza uburyo n’umubare w’ababazwa kugira ngo ibizavamo bizabe ari ibintu bifite ingufu kurushaho.

Jean Pierre NIZEYIMANA
UM– USEKE.RW